ബെംഗളൂരു: സംസ്ഥാനത്തുടനീളം കാലവര്ഷം വൈകിയതോടെ ദുരിതത്തിലായ കര്ഷകര് മഴ ലഭിക്കാന് കഴുതകളുടെ വിവാഹം നടത്തി. ബെളഗാവി ഹനുമാന് ക്ഷേത്രത്തിലാണ് വിചിത്രമായ ആചാരം നടന്നത്.
മുദലഗി താലൂക്കിലെ മുന്യാല ഗ്രാമവാസികളാണ് വിവാഹച്ചടങ്ങുകള് നടത്തിയത്. പ്രദേശത്ത് മഴ ലഭിക്കാനായി പ്രാര്ത്ഥിക്കുന്നതിനാണ് കഴുത വിവാഹം നടത്തിയത്. ആണ് കഴുതയായ കാന്തേഷിന്റേയും പെണ് കഴുതയായ കസ്തൂരിയുടേയുമായിരുന്നു വിവാഹം. മഞ്ഞള് ചടങ്ങുകള്, നൂല് കെട്ടല് എന്നിവയുള്പ്പെടെ മനുഷ്യ വിവാഹങ്ങളുടെ എല്ലാ പ്രധാന ആചാരങ്ങളും പാലിച്ചാണ് വിവാഹം നടത്തിയത്. വധൂവരന്മാരെപ്പോലെ വസ്ത്രങ്ങള്, മംഗല്യസൂത്രം തുടങ്ങിയ ആഭരണങ്ങള് കൊണ്ട് കഴുതകളെ അലങ്കരിച്ചു. വിവാഹശേഷം, നാടന് സംഗീതത്തോടെ ഗ്രാമത്തിലെ പ്രധാന തെരുവുകളിലൂടെ ഘോഷയാത്രയും നടത്തി.
പരിപാടിയില്, ഗ്രാമത്തിലെ സ്ത്രീകള് കഴുതകള്ക്ക് ആരതി നടത്തുകയും പ്രദേശത്തുടനീളം നല്ല മഴയ്ക്കും സമൃദ്ധമായ വിളവെടുപ്പിനും വേണ്ടി പ്രാര്ത്ഥിക്കുകയും ചെയ്തു. വിവാഹത്തില് പങ്കെടുത്ത ഗ്രാമീണര്ക്കായി ചോറ്, സാമ്പാര്, മധുരപലഹാരങ്ങള് എന്നിവയുള്പ്പെടെയുള്ള ഭക്ഷണങ്ങളും ഒരുക്കി. ഏകദേശം 20 വര്ഷത്തിന് ശേഷമാണ് ഇത്തരമൊരു ചടങ്ങ് നടത്തുന്നത്. ഗാമവാസികള് ഈ പരിപാടിക്കായി ഏകദേശം 60,000 രൂപയാണ് ചെലവഴിച്ചത്.
