തിരുവനന്തപുരം: പിഎസ്സി ചെയര്മാന് പ്രധാനമന്ത്രി മോദിക്ക് ലഭിക്കുന്നതിനേക്കാള് ഇരട്ടി ശമ്പളം ലഭിക്കുന്നതായി കണ്ടെത്തല്. പ്രധാനമന്ത്രി മോദിയേക്കാള് ഭാരിച്ച ജോലികള് ചെയ്യുന്നതല്ലേ അതുകൊണ്ടാവുമെന്നാണ് സമൂഹമാധ്യമങ്ങളില് പരിഹാസം ഉയരുന്നത്.
2025ലെ ശമ്പള പരിഷ്കരണത്തിന് ശേഷം പിഎസ്സി ചെയര്മാന് 4.10 ലക്ഷം രൂപയും അംഗങ്ങള്ക്ക് 4 ലക്ഷം രൂപയുമാണ് മൊത്ത ശമ്പളം. പ്രധാനമന്ത്രിക്ക് 2.80 ലക്ഷം രൂപയും മുഖ്യമന്ത്രിക്ക് 1.85 ലക്ഷം രൂപയും മാത്രമാണ് ശമ്പളം.
പിഎസ് സി ചെയര്മാനും അംഗങ്ങള്ക്കും നല്കി വരുന്ന അതിഭീമമായ ശമ്പളം വെട്ടിക്കുറയ്ക്കാന് സര്ക്കാര് തയാറാവണമെന്ന ആവശ്യവുമായി കോണ്ഗ്രസ് നേതാവ് ചെറിയാന് ഫിലിപ്പ് രംഗത്ത് വന്നു.
പ്രധാനമന്ത്രി, മുഖ്യമന്ത്രി എന്നിവരേക്കാള് ഉയര്ന്ന ശമ്പളമാണ് പിഎസ് സി അംഗങ്ങള്ക്ക് നല്കുന്നത്. പിഎസ്സിയുടെ വിശ്വാസ്യത വീണ്ടെടുക്കാന് സര്ക്കാര് ശക്തമായ നടപടികള് സ്വീകരിക്കണമെന്നും ചെറിയാന് ഫിലിപ്പ് ആവശ്യപ്പെട്ടു. നീതിബോധവും അര്ഹതയും യോഗ്യതയും ഉള്ള കളങ്കരഹിതരെയാണ് പിഎസ്സി യുടെ ഉന്നതസ്ഥാനങ്ങളില് നിയമിക്കേണ്ടതെന്നും ചെറിയാന് ഫെയ്സ്ബുക്കില് കുറിച്ചു.
