ചെന്നൈ: വികസിത രാജ്യങ്ങള് അപകടകരമായ ഖരമാലിന്യങ്ങള് വികസ്വര രാജ്യങ്ങളിലേക്ക് തള്ളുന്നത് തടഞ്ഞ് മദ്രാസ് ഹൈക്കോടതി .
ഇത് ‘മാലിന്യ കൊളോണിയലിസത്തിന്’ തുല്യമാണെന്ന് ജസ്റ്റിസ് ഡി ഭാരത ചക്രവര്ത്തി ചൂണ്ടിക്കാട്ടി. നിയമവിരുദ്ധമായി ഇറക്കുമതി ചെയ്ത ഖരമാലിന്യങ്ങള് അത് അയച്ച രാജ്യത്തേക്ക് തന്നെ തിരിച്ചയയ്ക്കാന് കോടതി നിര്ദ്ദേശം നല്കി.
‘അപകടകരമോ വിഷലിപ്തമോ മറ്റ് ആയ മാലിന്യങ്ങള് സംസ്കരിക്കുന്നതിന്റെ ഭാരം വികസ്വര രാജ്യങ്ങളുടെ മേല് ചുമത്തുന്നത് അനുവദിക്കാനാവില്ല. ഇത്തരം നടപടികള് പരിസ്ഥിതി നീതിയെ ദുര്ബലപ്പെടുത്തുകയും പൊതുജനാരോഗ്യത്തിനും പാരിസ്ഥിതിക സുരക്ഷയ്ക്കും ഗുരുതരമായ ഭീഷണി ഉയര്ത്തുകയും ചെയ്യും’ കോടതി പറഞ്ഞു.
ശിവകാശി ആസ്ഥാനമായുള്ള ശ്രീപതി പേപ്പര് ആന്ഡ് ബോര്ഡ്സ് പ്രൈവറ്റ് ലിമിറ്റഡ്, രാജരാജേശ്വരി ക്രാഫ്റ്റ്സ് പ്രൈവറ്റ് ലിമിറ്റഡ് എന്നിവ സമര്പ്പിച്ച ഹര്ജികള് പരിഗണിക്കുകയായിരുന്നു കോടതി. രണ്ട് കമ്പനികളും വേസ്റ്റ് പേപ്പര് ഇറക്കുമതി ചെയ്തിരുന്നു. ഈ കണ്ടെയ്നറുകളില് മുനിസിപ്പല് ഖരമാലിന്യം ഉള്പ്പെട്ടിട്ടുള്ളതായി കസ്റ്റംസ് നടത്തിയ പരിശോധനയില് കണ്ടെത്തി.
അവ ഇറക്കുമതി ചെയ്ത രാജ്യങ്ങളിലേക്ക് തിരിച്ചയയ്ക്കാന് അവര് നിര്ദ്ദേശിച്ചു. ഇതിനെതിരെയാണ് അധിക ചെലവു ചൂണ്ടിക്കാട്ടി കമ്പനികള് കോടതിയെ സമീപിച്ചത്.
