ടെഹ്റാന് : പരമോന്നത നേതാവ് ആയത്തുള്ള സെയ്ദ് അലി ഖമേനിയുടെ സംസ്കാര ചടങ്ങില് പങ്കെടുത്തതിന് ഇന്ത്യയ്ക്ക് ഇറാന് നന്ദിയും കടപ്പാടും അറിയിച്ചു. ഇന്ത്യയുടെ പ്രവൃത്തി പരസ്പര ബഹുമാനത്തിന്റെ ശക്തമായ പ്രകടനമാണെന്നും ഇരു രാജ്യങ്ങളും തമ്മിലുള്ള ചരിത്രപരവും സാംസ്കാരികവുമായ ബന്ധത്തെ പ്രതിഫലിപ്പിക്കുന്നുവെന്നും ഇറാന് വിശേഷിപ്പിച്ചു. ഇസ്ലാമിക് റിപ്പബ്ലിക് ഒരിക്കലും ‘സൗഹൃദത്തിന്റെയും അനുകമ്പയുടെയും ഹൃദയംഗമമായ ആദരവിന്റെയും ഈ പ്രകടനം മറക്കില്ലെ’ന്നും രാജ്യം വ്യക്തമാക്കി.
ഫെബ്രുവരിയില് ടെഹ്റാനില് നടന്ന യുഎസ്-ഇസ്രായേല് ആക്രമണങ്ങളില് കൊല്ലപ്പെട്ട ഇറാനിയന് പരമോന്നത നേതാവിന് ബീഹാര് ഗവര്ണര് ലെഫ്റ്റനന്റ് ജനറല് (റിട്ട) സയ്യിദ് അതാ ഹസ്നൈന്, വിദേശകാര്യ സഹമന്ത്രി പാബിത്ര മാര്ഗരിറ്റ എന്നിവരടങ്ങുന്ന ഉന്നതതല ഇന്ത്യന് പ്രതിനിധി സംഘം ആദരാഞ്ജലികള് അര്പ്പിച്ചു. കോണ്ഗ്രസ് നേതാവ് സല്മാന് ഖുര്ഷിദ്, ജമ്മു കശ്മീര് മുന് മുഖ്യമന്ത്രിയും പീപ്പിള്സ് ഡെമോക്രാറ്റിക് പാര്ട്ടി മേധാവിയുമായ മെഹബൂബ മുഫ്തി, ഇന്ത്യയില് നിന്നുള്ള സിഖ്, ഹിന്ദു, മുസ്ലീം, ക്രിസ്ത്യന് മതനേതാക്കള് എന്നിവരും ഇന്ത്യന് പ്രതിനിധി സംഘത്തിലുണ്ടായിരുന്നു.
