തിരുവനന്തപുരം: സ്വകാര്യ പണമിടപാട് സ്ഥാപനത്തിലെ ജീവനക്കാരി വെങ്ങാനൂര് സ്വദേശിനി അഞ്ജു വിഷം കഴിച്ച് ചികിത്സയിലിരിക്കെ മരിച്ച സംഭവത്തില് ഒരാള് അറസ്റ്റില്. പനങ്ങോട് സ്വദേശിനി സിന്ധുവിനെയാണ് പൊലീസ് പിടികൂടിയത്. അഞ്ജുവും സുഹൃത്ത് ഐശ്വര്യയും കഴിഞ്ഞ ജൂണ് 30-നാണ് ആത്മഹത്യയ്ക്ക് ശ്രമിച്ചത്. ആത്മഹത്യയ്ക്ക് ശ്രമിച്ച അഞ്ജുവിന്റെ സുഹൃത്ത് ഐശ്വര്യ നിലവില് ആശുപത്രിയില് ചികിത്സയിലാണ്.
70 പവന് സ്വര്ണം തട്ടിപ്പ് നടത്തിയതിലെ മാനസിക സമ്മര്ദ്ദത്തെ തുടര്ന്നാണ് അഞ്ജുവും സഹപ്രവര്ത്തകയും ആത്മഹത്യക്ക് ശ്രമിച്ചത്.ഇരുവരും ജോലി ചെയ്തിരുന്ന സ്വര്ണ പണയ സ്ഥാപനത്തില് നിന്ന് 70 പവന് സ്വര്ണമാണ് ഇരുവരും ചേര്ന്ന് അറസ്റ്റിലായ സിന്ധുവിന് എടുത്തു നല്കിയത്. നാട്ടുകാര് പണയം വെച്ചിരുന്ന സ്വര്ണമാണ് ഇത്. മറ്റ് സ്ഥാപനങ്ങളില് ഈ സ്വര്ണം കുറഞ്ഞ പലിശയ്ക്ക് പണയം വച്ച്, ഇതില് നിന്നുള്ള കമ്മീഷന് തുക അഞ്ജുവിനും ഐശ്വര്യക്കും ലഭിച്ചിരുന്നു എന്നുമാണ് വിവരം.പണയം വച്ച സ്വര്ണം നാട്ടുകാര് തിരികെ ആവശ്യപ്പെട്ടതോടെയാണ് തട്ടിപ്പ് വിവരങ്ങള് സ്ഥാപനത്തിലെ മാനേജര് അറിയുന്നത്.യഥാര്ത്ഥ ഉടമസ്ഥര്ക്ക് സ്വര്ണം തിരികെ നല്കാന് കഴിയാതെ വന്നതോടെ ജീവനക്കാരികള് പ്രതിസന്ധിയിലായി.
ഇതോടെയാണ് വിഷം കഴിച്ച് ആത്മഹത്യയ്ക്ക് ശ്രമിച്ചത്. കേസില് ഇപ്പോള് അറസ്റ്റിലായ പനങ്ങോട് സ്വദേശിനി സിന്ധു നേരത്തെയും നിരവധി തട്ടിപ്പ് കേസുകളില് പ്രതിയായിട്ടുള്ള വ്യക്തിയാണെന്ന് പൊലീസ് പറയുന്നു.
