കറാച്ചി : പാകിസ്ഥാനിലെ ഗ്വാദർ തുറമുഖ പ്രദേശത്ത് കനത്ത ആക്രമണം നടത്തി ബലൂച് ലിബറേഷൻ ആർമി. ആക്രമണത്തിൽ 30 ലധികം പാകിസ്ഥാൻ സുരക്ഷാ ഉദ്യോഗസ്ഥർ കൊല്ലപ്പെടുകയും നിരവധി പേർക്ക് പരിക്കേൽക്കുകയും ചെയ്തതായി ബി എൽ എ അവകാശപ്പെടുന്നു. വെള്ളിയാഴ്ച വൈകുന്നേരമാണ് ആക്രമണം നടന്നത്.
ബിഎൽഎയുടെ എലൈറ്റ് യൂണിറ്റായ മജീദ് ബ്രിഗേഡാണ് ഓപ്പറേഷൻ നടത്തിയത്. അവരുടെ അഭിപ്രായത്തിൽ, അജ്മൽ എന്ന അത്തൗല്ല ബലൂച്ച് എന്നയാൾ ജിവാനിയിലെ പൻവാൻ പ്രദേശത്തെ കോസ്റ്റ് ഗാർഡ് ക്യാമ്പിലേക്ക് സ്ഫോടകവസ്തുക്കൾ നിറച്ച മസ്ദ ട്രക്ക് ഓടിച്ചുകയറ്റി. പ്രാദേശിക സമയം വൈകുന്നേരം 6:32 ഓടെയാണ് സംഭവം. ട്രക്കിനുള്ളിലെ സ്ഫോടനത്തിൽ ക്യാമ്പിൽ വൻ നാശനഷ്ടമുണ്ടായി. കോട്ട ഗാർഡ് ക്യാമ്പ് പൂർണ്ണമായും തകർന്നതായി ബിഎൽഎ വക്താവ് ജിയാൻഡ് ബലൂച്ച് പ്രസ്താവനയിൽ പറഞ്ഞു.
ട്രക്ക് ക്യാമ്പിലേക്ക് പ്രവേശിക്കുന്നത് കാണിക്കുന്ന 43 സെക്കൻഡ് ദൈർഘ്യമുള്ള വീഡിയോയും ബിഎൽഎയുടെ മാധ്യമ വിഭാഗമായ ഹക്കൽ പുറത്തുവിട്ടു. പിന്നീടുള്ള ദൃശ്യങ്ങളിൽ ക്യാമ്പിന്റെ വലിയ ഭാഗങ്ങൾ നശിപ്പിക്കപ്പെട്ടതായി കാണിക്കുന്നു.
ട്രക്ക് ബോംബാക്രമണത്തിന് തൊട്ടുപിന്നാലെ ബിഎൽഎയുടെ ഫത്തേ സ്ക്വാഡ് ക്യാമ്പ് ആക്രമിച്ചു. ഗ്രൂപ്പിന്റെ പ്രസ്താവന പ്രകാരം അവരുടെ പോരാളികൾ എല്ലാ വശങ്ങളിൽ നിന്നും ക്യാമ്പിലേക്ക് പ്രവേശിച്ച് ബാക്കിയുള്ള സുരക്ഷാ ഉദ്യോഗസ്ഥരുമായി അടുത്ത പോരാട്ടത്തിൽ ഏർപ്പെട്ടുവെന്നാണ്. ഓപ്പറേഷനിൽ 30 ലധികം സുരക്ഷാ ഉദ്യോഗസ്ഥർ കൊല്ലപ്പെട്ടതായി ബിഎൽഎ അവകാശപ്പെടുന്നു. അവശിഷ്ടങ്ങൾക്കിടയിൽ കുടുങ്ങിക്കിടക്കുന്നവരുടെയും പരിക്കേറ്റവരുടെയും നില ഗുരുതരമാണെന്നും മരണസംഖ്യ ഇനിയും ഉയരാമെന്നും വക്താവ് പറഞ്ഞു.
ഇതിനു പുറമെ ബിഎൽഎയുടെ ഭാവി പദ്ധതികൾ
ആക്രമണത്തിന്റെ പൂർണ്ണ വിവരങ്ങൾ ഉടൻ തന്നെ ഔദ്യോഗിക ചാനലുകളിൽ പുറത്തുവിടുമെന്ന് സംഘടന അറിയിച്ചു. ബലൂചിസ്ഥാന് പൂർണ്ണ സ്വാതന്ത്ര്യം ലഭിക്കുന്നതുവരെ പാകിസ്ഥാൻ സുരക്ഷാ സേനയ്ക്കെതിരായ സായുധ ആക്രമണം ഇതേ തീവ്രതയോടെ തുടരുമെന്നും അവർ കൂട്ടിച്ചേർത്തു.
