മുംബൈ: സ്കൂളുകളുടെ 500 മീറ്റര് ചുറ്റളവില് സ്റ്റിങ് എന്ന എനര്ജി ഡ്രിങ്കും മറ്റ് ലഹരി വസ്തുക്കളും വില്ക്കുന്നതിന് മഹാരാഷ്ട്രയില് നിരോധനം. സ്റ്റിങ്ങിലെ ചേരുവകകളില് ചിലത് കുട്ടികളുടെ ആരോഗ്യത്തിന് അനുയോജ്യമല്ലെന്ന് ആശങ്ക ഉയര്ന്നതിനെ തുടര്ന്ന് ആരോഗ്യവകുപ്പ് മന്ത്രി നര്ഹരി സിര്വാളാണ് നിരോധനം കൊണ്ടുവന്നത്.
സ്കൂള് വിദ്യാര്ത്ഥികള്ക്കിടയില് എനര്ജി ഡ്രിങ്കുകളുടെ ഉപയോഗം വര്ദ്ധിച്ചു വരുന്നതായും, അമിത ഉപയോഗത്തില് ബിജെപി എംഎല്എ വിക്രം പച്ച്പ്യൂട്ട് കഴിഞ്ഞ ദിവസം നിയമസഭയില് ഇത് സംബന്ധിച്ച് ആശങ്ക പ്രകടിപ്പിക്കുകയും ചെയ്തിരുന്നു. ഇതോടെയാണ് സ്കൂള് പരിസരത്ത് സ്റ്റിങ്ങിന് നിരോധനം കൊണ്ടുവന്നത്. നിയമം പാലിച്ച് സ്റ്റിങ്ങിന്റെ കുപ്പിയില് വിദ്യാര്ത്ഥികള്ക്കും ഗര്ഭിണികള്ക്കുമിത് അനുയോജ്യമല്ലന്ന് എഴുതിയിട്ടുണ്ട്. എന്നിട്ടും വിദ്യാര്ത്ഥികള്ക്കിടയില് ഇതിന്റെ ഉപയോഗം വര്ദ്ധിച്ച് വരുന്നതായി കണ്ടെത്തിയിട്ടുണ്ട്.
എനര്ജി ഡ്രിങ്ക് എന്ന പേരില് ഇത്തരത്തിലുള്ള ശീതള പാനീയങ്ങള് വിറ്റഴിക്കുക, സ്കൂള് പരിസരത്ത് സുഗന്ധ ദ്രവ്യങ്ങളുടെ മറവില് മയക്കുമരുന്ന് വില്ക്കുന്നതിനെ കുറിച്ച് അന്വേഷിക്കാനും സിര്വാള് ഉത്തരവിറക്കി. സംസ്ഥാന ഫുഡ് ആന്ഡ് ഡ്രഗ് അഡ്മിനിസ്ട്രേഷന് (എഫ്ഡിഎ) കമ്മിഷണര് തുകാറാം മുണ്ടെയുടെ നേതൃത്വത്തിലാണ് അന്വേഷണം. കൂടാതെ മായം ചേര്ത്ത പാല് വില്ക്കല്, അമിത നിരക്കില് പഞ്ചസാരയും കൃത്രിമ വസ്തുക്കളുമടങ്ങിയ ഭക്ഷ്യ വസ്തുക്കള് വില്ക്കുന്നതിലും അന്വേഷണം നടത്തും.
എനര്ജി ഡ്രിങ്കുകളുമായി ബന്ധപ്പെട്ട ആരോഗ്യ അപകടങ്ങളെക്കുറിച്ച് സ്കൂളുകളിലും മറ്റും ബോധവത്കരണ പരിപാടികള് സംഘടിപ്പിക്കാന് ആവശ്യപ്പെട്ടിട്ടുണ്ടെന്നും അദ്ദേഹം കൂട്ടിച്ചേര്ത്തു.
