ചെന്നൈ : നടൻ കമൽഹാസന്റെ പ്രണയങ്ങൾ എപ്പോഴും വാര്ത്തകളിൽ ഇടംപിടിക്കാറുമുണ്ടായിരുന്നു. 1978 ൽ ഇരുപത്തി നാലാമത്തെ വയസിൽ നർത്തകിയായിരുന്ന വാണി ഗണപതിയെ ആണ് കമൽ ആദ്യം വിവാഹം കഴിക്കുന്നത്. പത്തു വർഷത്തിനു ശേഷം ഈ ദമ്പതികൾ വേർപിരിഞ്ഞു.
വാണിയുമായുള്ള വിവാഹത്തിന് മുൻപ് കമലിനൊപ്പം നിരവധി ചിത്രങ്ങളിൽ നായികയായിട്ടുള്ള ശ്രീവിദ്യയുമായി താരത്തിന് ബന്ധമുണ്ടായിരുന്നു. എന്നാൽ ഈ ബന്ധം വിവാഹത്തിൽ കലാശിച്ചില്ല. പിന്നീടാണ് നടി സരികയെ വിവാഹം കഴിക്കുന്നത്. ഈ ബന്ധത്തിൽ ശ്രുതി ഹാസൻ, അക്ഷര ഹാസൻ എന്നീ രണ്ട് മക്കളുമുണ്ട്.
എന്നാൽ തന്റെ സിനിമകളെക്കുറിച്ച് സംസാരിക്കുന്നതിന് പകരം ആളുകൾ തന്റെ സ്വകാര്യജീവിതത്തിൽ ശ്രദ്ധ കേന്ദ്രീകരിക്കുന്നതിനെതിരെ അദ്ദേഹം ഒരിക്കൽ പരസ്യമായി അതൃപ്തി പ്രകടിപ്പിച്ചിരുന്നു.
” എനിക്ക് ഏതാണോ ശരി എന്ന് തോന്നിയത് അത് ഞാൻ ചെയ്തു, അവർക്ക് (പങ്കാളികൾക്ക്) ഏതാണോ ശരി എന്ന് തോന്നിയത് അവരും ചെയ്തു. കൂടുതലും പുരുഷന്മാർക്ക് എന്റെ ജീവിതത്തോട് അസൂയയാണ്; അതുകൊണ്ടാണ് അവർ അങ്ങനെയൊക്കെ സംസാരിക്കാൻ ശ്രമിക്കുന്നത്. എന്റെ ജീവിതത്തിലുണ്ടായിരുന്ന രണ്ട് സ്ത്രീകളെയും ഞാൻ സ്നേഹിച്ചിരുന്നു, ഇനിയും സ്നേഹിക്കാൻ എനിക്ക് കഴിവുമുണ്ട്.” കമൽ പറഞ്ഞു.
“ഒരു ലൈംഗികത്തൊഴിലാളിയുടെ അടുത്തേക്ക് പോകുന്നതിൽ ഞാൻ വിശ്വസിക്കുന്നില്ല, ഞാൻ ഒരിക്കലും അത് ചെയ്തിട്ടില്ല. എന്റെ ജീവിതത്തിലെ എന്തിനെക്കുറിച്ചും കള്ളം പറയുന്നതിൽ ഞാൻ വിശ്വസിക്കുന്നില്ല. ഇനി നമുക്ക് കമൽഹാസൻ എന്ന നടനെക്കുറിച്ച് സംസാരിക്കാം” അദ്ദേഹം കൂട്ടിച്ചേര്ത്തു.
