ന്യൂദല്‍ഹി: ചലച്ചിത്ര വ്യവസായ മേഖലയുടെ വളര്‍ച്ചയ്‌ക്കായി രണ്ട് സുപ്രധാന തീരുമാനങ്ങളുമായി കേന്ദ്ര വാര്‍ത്താവിതരണ പ്രക്ഷേപണ മന്ത്രാലയം. സിനിമ മേഖല നേരിടുന്ന വെല്ലുവിളികളെക്കുറിച്ച് പഠിക്കുന്നതിനായി ഒരു സമിതി, സംസ്ഥാന സിനിമ നിയന്ത്രണ മാതൃക എന്നിവയാണ് പുതിയ രണ്ട് നിര്‍ണായക തീരുമാനങ്ങള്‍. മന്ത്രി അശ്വിനി വൈഷ്ണവിന്റെ അധ്യക്ഷതയില്‍ ചേര്‍ന്ന അവലോകന യോഗത്തിന്റേതാണ് തീരുമാനം.
സിനിമ മേഖലയിലെ അവസരങ്ങളെയും വെല്ലുവിളികളെയും കുറിച്ച് പഠിക്കുന്നതിനായി ഒരു ഉന്നതതല പഠന ഗ്രൂപ്പിന് രൂപം നല്‍കിയിട്ടുണ്ട്. സിബിഎഫ്‌സി മേധാവി പ്രസൂണ്‍ ജോഷിയാണ് ഗ്രൂപ്പിന്റെ അധ്യക്ഷന്‍. ചലച്ചിത്ര മേഖലയിലെ വിദഗ്ധരും സാങ്കേതിക പങ്കാളികളും ഇതില്‍ അംഗങ്ങളായിരിക്കും. മൂന്ന് മാസത്തിനുള്ളില്‍ റിപ്പോര്‍ട്ട് സമര്‍പ്പിക്കാനും നിര്‍ദേശം നല്‍കിയിട്ടുണ്ട്.
സംസ്ഥാന സിനിമ നിയന്ത്രണ മാതൃകയാണ് മറ്റൊന്ന്. നിലവില്‍ സിനിമയുടെ നിയന്ത്രണത്തിനായി ഓരോ സംസ്ഥാനങ്ങളും വ്യത്യാസ്ത നിയമങ്ങളാണ് തുടരുന്നത്. ഈ നിയമങ്ങള്‍ സിനിമയുടെ അടിസ്ഥാന സൗകര്യ വികസനങ്ങളെയും ലൈസന്‍സ് പ്രക്രിയകളെയും ബാധിക്കാറുണ്ട്.
അത്തരം പ്രശ്‌നങ്ങള്‍ക്കുള്ള പരിഹാരമായാണ് സംസ്ഥാനങ്ങള്‍ക്കുള്ള നിര്‍ദേശങ്ങള്‍ എന്ന് മന്ത്രാലയം പുറത്തിറക്കിയ പ്രസ്താവനയില്‍ പറയുന്നു. ചലച്ചിത്ര മേഖലയെ ആഗോളതലത്തില്‍ മത്സരക്ഷമതയുള്ള വ്യവസായമാക്കി മാറ്റുകയാണ് ഈ തീരുമാനങ്ങള്‍ക്ക് പിന്നിലെ ലക്ഷ്യമെന്നും മന്ത്രാലയം വ്യക്തമാക്കി.
