ചെറായി (കൊച്ചി): രാജ്യാന്തരതലത്തില് ശ്രദ്ധേയനായ കാര്ട്ടൂണിസ്റ്റും ചിത്രകാരനുമായ ചെറായി സ്വദേശി സി.ബി. ഷിബുവിന്റെ ചിത്രം സംസ്ഥാനത്തെ എട്ടാം ക്ലാസിലെ മലയാളം അടിസ്ഥാന പാഠാവലി പാഠ പുസ്തകത്തില് ഇടംപിടിച്ചു. പുസ്തകത്തിലെ ‘കനിവും കരുതലും’ എന്ന ഒന്നാം അധ്യായത്തിന്റെ തലക്കെട്ടിന് താഴെയാണ് ചിത്രകാരന് മുരളി നാഗപ്പുഴയുടെ ചിത്രത്തോടൊപ്പം ഷിബുവിന്റെ ചിത്രവും ഉള്പ്പെടുത്തിയിട്ടുള്ളത്.
ഏഥന്സിലെ ഡാഫ്നി-യമിറ്റോസ് മുനിസിപ്പാലിറ്റിയുടെ ഒന്പതാമത് ഇന്റര്നാഷണല് കാര്ട്ടൂണ് എക്സിബിഷനില് പരിസ്ഥിതിയും കാലാവസ്ഥാ വ്യതിയാനവും എന്ന വിഷയത്തില് മെരിറ്റ് അവാര്ഡ് (ഓണര് അവാര്ഡ്) നേടിയ വരള്ച്ച എന്ന ചിത്രമാണ് പാഠപുസ്തകത്തില് ഉള്പ്പെടുത്തിയത്. ആഗോളതാപനത്തെ തുടര്ന്ന് വരണ്ടുണങ്ങി വിണ്ടുകീറിയ ഭൂമിയില്, ഒരു തുള്ളി കുടിവെള്ളത്തിനായി വലയുന്ന പാവപ്പെട്ട മനുഷ്യരുടെ അതിജീവന പോരാട്ടമാണ് ചിത്രം ദൃശ്യവല്ക്കരിക്കുന്നത്.
പ്രകൃതിയുടെ പച്ചപ്പും വന്യതയും നിറഞ്ഞ മുരളി നാഗപ്പുഴയുടെ ചിത്രവും വരള്ച്ചയുടെ രൂക്ഷത വ്യക്തമാക്കുന്ന സി.ബി. ഷിബുവിന്റെ ചിത്രവും ഒന്നിച്ച് നല്കിക്കൊണ്ട് ‘ഈ ചിത്രങ്ങള് നമ്മോട് എന്താണ് പറയുന്നത്?’ എന്ന വിഷയത്തില് വിദ്യാര്ത്ഥികള്ക്കിടയില് ചര്ച്ചയും ചിന്തയും വളര്ത്തുകയാണ് ഇതിലൂടെ ലക്ഷ്യമിടുന്നത്.
ചിത്രകലയിലെ ഓണര് അവാര്ഡ് ഉള്പ്പെടെ നിരവധി അന്താരാഷ്ട്ര പുരസ്കാരങ്ങള് നേടിയിട്ടുള്ള കലാകാരനാണ് ഷിബു. തപസ്യ കലാ സാഹിത്യവേദി വൈപ്പിന് സമിതിയിലെ അംഗമാണ്.
