തിരുവനന്തപുരം:പത്ത് ചോദ്യങ്ങള്‍ പരിശോധിക്കാതെ പുറത്തിറക്കിയ പിഎസ് സി റാങ്ക് പട്ടിക റദ്ദാക്കും.വിവാദ പട്ടിക അനുസരിച്ചുള്ള നിയമനം പുനഃപരിശോധിച്ച് എല്ലാ ഉദ്യോഗാര്‍ത്ഥികളുടെയും ഉത്തരക്കടലാസ് വീണ്ടും മൂല്യനിര്‍ണയം നടത്താനും തിങ്കളാഴ്ച ചേര്‍ന്ന കമ്മീഷന്‍ യോഗം തീരുമാനിച്ചു.
ചോദ്യങ്ങള്‍ ഒഴിവാക്കി മൂല്യ നിര്‍ണയം നടത്തിയത് വിജിലന്‍സ് ആഭ്യന്തരവിഭാഗം എസ് പിയുടെ നേതൃത്വത്തില്‍ അന്വേഷിക്കും. ആസൂത്രണ ബോര്‍ഡിലേക്കുള്ള റാങ്ക് പട്ടിക പുതുക്കാനാണ് തീരുമാനിച്ചത്.
പിഎസ് സിയില്‍ ഇടത് സര്‍ക്കാരിന്റെ ഭരണകാലത്ത് നിയമിച്ച അംഗങ്ങളാണ് ഇപ്പോഴുളളത്. സ്ഥാപനത്തിന്റെ വിശ്വാസ്യതയെ തന്നെ ബാധിച്ചിരിക്കുന്ന ഞെട്ടിപ്പിക്കുന്ന വാര്‍ത്തയാണ് പുറത്തു വന്നത്. ആസൂത്രണ ബോര്‍ഡിലെ ഇന്‍ഡസ്ട്രി ആന്റ് ഇന്‍ഫ്രാസ്‌ട്രെക്ചര്‍ വിഭാഗം ചീഫ്, പേഴ്‌സ്പ്ടീവ് പ്ലാനിംഗ് വിഭാഗം ചീഫ്, പ്ലാനിംഗ് കോര്‍ഡിനേഷന്‍ ഡിവിഷന്‍ ചീഫ് തസ്തികകളിലേക്കുള്ള നിയമനങ്ങളിലാണ് സമഗ്ര അഴിച്ചുപണി. മൂന്ന് തസ്തികകളിലും പൊതുവായ പരീക്ഷയിലെ 10 ചോദ്യങ്ങള്‍ ഒഴിവാക്കിയായിരുന്നു മൂല്യനിര്‍ണയം.ഇടത് സര്‍വീസ് സംഘടനാ നേതാവിനാണ് ആദ്യ തസ്തികയില്‍ ഒന്നാം റാങ്കും നിയമനവും ലഭിച്ചത്. മറ്റൊരു തസ്തികയിലേക്ക് അഡൈ്വസ് മെമ്മോ അയച്ചിരുന്നു. ഉത്തരക്കടലാസ് പോലും ഉദ്യോഗാര്‍ത്ഥികള്‍ക്ക് നല്‍കാതെ ഒളിച്ചുകളി നടത്തിയ പിഎസ് സി, വാര്‍ത്ത പുറത്തു വന്നതിന് പിന്നാലെ തിരുത്തലിന് നിര്‍ബന്ധിതരാവുകയായിരുന്നു.
പരീക്ഷ എഴുതിയത് 228 പേരാണ്. ഒഴിവാക്കിയ പത്ത് ചോദ്യങ്ങള്‍ക്കും ഇവരെല്ലാം നല്‍കിയ ഉത്തരം മൂല്യനിര്‍ണയം നടത്തും. 2023 ജൂലായ് 13 നാണ് പ്രാഥമിക പരീക്ഷ നടന്നത്. കഴിഞ്ഞ മേയ് 31ന് റാങ്ക് പട്ടിക പ്രസിദ്ധീകരിച്ചു.മൂന്ന് വര്‍ഷമായിട്ടും ഉദ്യോഗാര്‍ത്ഥികള്‍ക്ക് ഉത്തരക്കടലാസ് നല്‍കാത്തത് വലിയ സംശയങ്ങളാണ് ഉയര്‍ത്തിയത്. 58 മാര്‍ക്കിന്റെ പത്ത് ചോദ്യങ്ങളും ഒഴിവാക്കിയതിലും ഉള്ളത് വലിയ ദുരൂഹത.
