തിരുവനന്തപുരം: തിരഞ്ഞെടുപ്പ് കാലത്ത് കര്‍ണാടകയില്‍ നിന്ന് ഒഴുകിയെത്തിയ കള്ളപ്പണത്തിനുള്ള പ്രത്യുപകാരമായാണ് മദ്യത്തിന്റെ നികുതി വെട്ടിക്കുറയ്‌ക്കാന്‍ മുഖ്യമന്ത്രി തയ്യാറായതെന്ന് പിണറായി വിജയന്‍ ഫേ്സ്ബുക്കില്‍ കുറിച്ചു. സംസ്ഥാനത്ത് വന്‍ അഴിമതിയും കോര്‍പ്പറേറ്റ് കൊള്ളയുമാണ് നടക്കുന്നത്. യുഡിഎഫ് സര്‍ക്കാര്‍ അധികാരമേറ്റെടുത്ത് ഒരു മാസം തികയും മുന്‍പേ അഴിമതിയുടെ ദുരൂഹതകള്‍ സര്‍ക്കാരിനെ വലയം ചെയ്തു.
വീര്യം കുറഞ്ഞ മദ്യത്തിന്റെ നികുതി 251 ശതമാനത്തില്‍ നിന്ന് 120 ശതമാനമായി ഒറ്റയടിക്ക് വെട്ടിക്കുറയ്‌ക്കാന്‍ ചരടുവലികള്‍ നടന്നത് മാധ്യമങ്ങള്‍ തെളിവുസഹിതം പുറത്തുവിട്ടിരിക്കുകയാണെന്ന് പ്രതിപക്ഷ നേതാവ് ചൂണ്ടിക്കാട്ടി. അധികാരമേറ്റെടുത്ത് മൂന്ന് ദിവസത്തിനുള്ളില്‍ തന്നെ വകുപ്പ് മന്ത്രിയോ കോണ്‍ഗ്രസ് നേതൃത്വമോ പോലും അറിയാതെ ശരവേഗത്തിലാണ് മുഖ്യമന്ത്രിയുടെ ഓഫീസ് ഇതിനായുള്ള നീക്കങ്ങള്‍ നടത്തിയത്.
നിയമസഭയില്‍ ചര്‍ച്ചയ്‌ക്ക് പോലും തയ്യാറാകാതെ പലതും മറയ്‌ക്കാനുള്ള വ്യഗ്രതയിലാണ് മുഖ്യമന്ത്രിയും സര്‍ക്കാരും. ഇതുമായി ബന്ധപ്പെട്ട് താന്‍ നടത്തിയ പ്രസംഗം സഭാരേഖകളില്‍ നിന്നും സഭാ ടിവിയില്‍ നിന്നും നീക്കം ചെയ്യാന്‍ മുഖ്യമന്ത്രി ആവശ്യപ്പെട്ടത് ആ പരിഭ്രമം വ്യക്തമാക്കുന്നതാണെന്നും പിണറായി ആരോപിച്ചു.
