പ്രധാനമന്ത്രി നരേന്ദ്ര മോദിയുടെ നേതൃത്വത്തില് കഴിഞ്ഞ 12 വര്ഷത്തിനിടെ ഭാരതത്തിന്റെ കാര്ഷിക മേഖല ഒരു പുതിയ യുഗത്തിലേക്ക് കടന്നിരിക്കുകയാണ്. മുന്പ് ഭക്ഷ്യക്ഷാമവും പട്ടിണിയും പരിഹരിക്കുന്നതിലായിരുന്നു നമ്മുടെ ശ്രദ്ധ. ഇന്നത് കര്ഷക കേന്ദ്രീകൃതമായ നയങ്ങളിലൂടെ കൃഷിയെ സമൃദ്ധി, പോഷകാഹാര സുരക്ഷ, ഹരിത സാങ്കേതികവിദ്യ, ഗ്രാമീണ വികസനം എന്നിവ ഉറപ്പാക്കുന്ന സമഗ്ര അടിത്തറയായി മാറ്റിമറിച്ചിരിക്കുന്നു.
ഹരിതവിപ്ലവത്തിന് ശേഷം ആദ്യമായാണ് നയരൂപീകരണത്തിന്റെ ശ്രദ്ധ ‘ഉല്പാദനത്തിന്റെ അളവില്’ നിന്ന് മാറി, ‘കര്ഷകന്റെ യഥാര്ത്ഥ വരുമാനം, സുസ്ഥിരത, ഗ്രാമീണ സമ്പദ്വ്യവസ്ഥയുടെ കരുത്ത്’ എന്നിവയിലേക്ക് തിരിയുന്നത്. ഈ ചിന്താഗതിയാണ് പയറുവര്ഗ്ഗ-എണ്ണക്കുരു ദൗത്യം, കോട്ടണ് ദൗത്യം, പ്രകൃതി കൃഷിക്കായുള്ള ദേശീയ ദൗത്യം, പ്രധാന് മന്ത്രി ധന്ധാന്യ കൃഷി യോജന, ഖേത് ബച്ചാവോ അഭിയാന്, ഡിജിറ്റല് കൃഷി എന്നിവയെല്ലാം ചേര്ന്ന പുതിയ ദര്ശനത്തിന് വഴിയൊരുക്കിയത്.
വരുമാനവും സുരക്ഷിതത്വവും
ഭാരതം ഇന്ന് ചരിത്രത്തിലെ ഏറ്റവും ഉയര്ന്ന റെക്കോര്ഡ് ഭക്ഷ്യധാന്യ ഉത്പാദനമായ 376.563 ദശലക്ഷം ടണ് കൈവരിച്ചിരിക്കുന്നു. ഇത് കേവലം ഉത്പാദന വര്ദ്ധനവല്ല, ഗ്രാമീണ സമ്പദ്വ്യവസ്ഥയുടെ ശാക്തീകരണത്തിന്റെ തെളിവാണ്. ഇതിനൊപ്പം കര്ഷകരുടെ വരുമാന സുരക്ഷയ്ക്കും മുന്ഗണന നല്കുന്നു:
പിഎം കിസാന് സമ്മാന് നിധി: ഇതുവരെ 22 ഗഡുക്കളായി 4.27 ലക്ഷം കോടിയിലധികം രൂപ 9 കോടിയിലധികം കര്ഷക കുടുംബങ്ങളുടെ ബാങ്ക് അക്കൗണ്ടുകളിലേക്ക് നേരിട്ട് കൈമാറി.
പിഎം ഫസല് ബീമാ യോജന: പ്രകൃതിക്ഷോഭങ്ങള് മൂലമുള്ള വിളനഷ്ടങ്ങള്ക്ക് ശക്തമായ ഇന്ഷുറന്സ് പരിരക്ഷ ഉറപ്പാക്കുന്നു.
ജലസേചനം, ഗ്രാമീണ റോഡുകള്, കോള്ഡ് ചെയിന് സംവിധാനങ്ങള് എന്നിവയിലെ നിക്ഷേപം ഉല്പാദനം, സംഭരണം, വിപണി ലഭ്യത എന്നിവയെ ശക്തമാക്കി. ഇന്ന് കൃഷി എന്നത് കേവലം ഭൂമിയുടെ അതിരുകളില് ഒതുങ്ങുന്നില്ല; ക്ഷീരമേഖല, ഫിഷറീസ്, പൗള്ട്രി, ഹോര്ട്ടികള്ച്ചര്, ഭക്ഷ്യസംസ്കരണം, സൗരോര്ജ്ജം എന്നിവ സമന്വയിക്കുന്ന പുതിയൊരു ഗ്രാമീണ ആവാസവ്യവസ്ഥയാണ് രൂപപ്പെടുന്നത്. ഇത് പുതിയ തൊഴിലവസരങ്ങള് സൃഷ്ടിക്കുകയും ഗ്രാമീണ വരുമാനം വര്ദ്ധിപ്പിക്കുകയും ചെയ്യുന്നു.
സ്വയംപര്യാപ്തതയും വിലസുരക്ഷയും
ദീര്ഘകാലമായി പയറുവര്ഗ്ഗങ്ങള്, ഭക്ഷ്യ എണ്ണകള്, പരുത്തി എന്നീ മേഖലകള് അവയുടെ പൂര്ണ്ണ ശേഷി കൈവരിച്ചിരുന്നില്ല. ഈ വെല്ലുവിളി പരിഹരിക്കാന് പ്രത്യേക ദൗത്യങ്ങള്ക്ക് കേന്ദ്ര സര്ക്കാര് തുടക്കം കുറിച്ചു.
ദേശീയ പയറുവര്ഗ്ഗ മിഷന്: ഉയര്ന്ന വിളവ് തരുന്ന വിത്തുകള്, ക്ലസ്റ്റര് കൃഷി, സംഭരണശാലകള്, ശക്തമായ കുറഞ്ഞ താങ്ങുവില എന്നിവയിലൂടെ പയറുവര്ഗ്ഗ ഉല്പാദനത്തില് സമ്പൂര്ണ്ണ സ്വയംപര്യാപ്തത ലക്ഷ്യമിടുന്നു.
എണ്ണക്കുരു ദൗത്യം: കടുക്, സോയാബീന്, പാം ഓയില് തുടങ്ങിയവയ്ക്ക് ഊന്നല് നല്കി ഭക്ഷ്യ എണ്ണകളുടെ ഇറക്കുമതിച്ചെലവ് കുറയ്ക്കാനും രാജ്യത്തിന്റെ എണ്ണ സുരക്ഷ ശക്തമാക്കാനും ഇത് സഹായിക്കുന്നു.
കോട്ടണ് ദൗത്യം: കീടപ്രതിരോധ ശേഷിയുള്ള മികച്ച പരുത്തി ഇനങ്ങള്, ആധുനിക കൃഷിരീതികള്, ടെക്സ്റ്റൈല് മൂല്യശൃംഖലയുമായുള്ള സംയോജനം എന്നിവയിലൂടെ കര്ഷകര്ക്ക് സുസ്ഥിരമായ വരുമാനവും ആഗോള വിപണി മത്സരക്ഷമതയും ഉറപ്പാക്കുന്നു.
പ്രകൃതികൃഷിക്കായുള്ള ദേശീയ ദൗത്യം
രാസവസ്തുക്കളുടെ അമിത ഉപയോഗവും മണ്ണും ഭൂഗര്ഭജലവും നേരിടുന്ന നാശവും കൃഷിരീതികള് മാറ്റേണ്ടതിന്റെ ആവശ്യകത വ്യക്തമാക്കുന്നു. പ്രധാനമന്ത്രിയുടെ ദീര്ഘവീക്ഷണത്തോടെ ഏകദേശം 75 ലക്ഷം ഹെക്ടര് ഭൂമി പ്രകൃതിദത്ത കൃഷിക്ക് കീഴില് കൊണ്ടുവരാനും ഒരു കോടി കര്ഷകരെ ഇതിന്റെ ഭാഗമാക്കാനും ലക്ഷ്യമിടുന്നു.
പരിശീലനം, സര്ട്ടിഫിക്കേഷന്, ബ്രാന്ഡിംഗ് എന്നിവയിലൂടെ ചെറുകിട കര്ഷകരെ ഇതിലേക്ക് ആകര്ഷിക്കുന്നു. മണ്ണിലെ ഫലഭൂയിഷ്ഠത കൂട്ടുക, കൃഷിച്ചെലവ് കുറയ്ക്കുക, കാലാവസ്ഥാ വ്യതിയാനങ്ങളെ പ്രതിരോധിക്കുക എന്നിവയാണ് ഇതിന്റെ വിപുലമായ ലക്ഷ്യങ്ങള്. പരിസ്ഥിതി സംരക്ഷണത്തോടൊപ്പം കര്ഷകരുടെയും ഉപഭോക്താക്കളുടെയും ആരോഗ്യസുരക്ഷയും ഇതിലൂടെ ഉറപ്പുനല്കുന്നു.
പിഎം ധന്ധാന്യ കൃഷി യോജനയും പിന്നാക്ക ജില്ലകളും
പ്രാദേശികമായ അസന്തുലിതാവസ്ഥ പരിഹരിക്കുന്നതിനായി, വിളവ് ദേശീയ ശരാശരിയേക്കാള് വളരെ താഴെയുള്ള 100 ജില്ലകളെ പ്രധാന് മന്ത്രി ധന്ധാന്യ കൃഷി യോജനയിലൂടെ തിരിച്ചറിഞ്ഞിട്ടുണ്ട്. ഇവിടെ 11 വകുപ്പുകളില് നിന്നുള്ള 36 പദ്ധതികളെ ഒരു സംയോജിത വികസന പാക്കേജിലൂടെ ഏകോപിപ്പിക്കുന്നു.
ജലസേചനം, വിത്തുകള്, ഹോര്ട്ടികള്ച്ചര്, അടിസ്ഥാന സൗകര്യങ്ങള് എന്നിവയെല്ലാം ഒരു ചട്ടക്കൂടിന് കീഴില് കൊണ്ടുവരുന്നതിലൂടെ വികസന പ്രക്രിയയുടെ കേന്ദ്രസ്ഥാനത്തേക്ക് കര്ഷകനും ഗ്രാമവും എത്തുന്നു. ഇത് പിന്നാക്ക മേഖലകളില് ലക്ഷ്യംവെച്ചുള്ള നിക്ഷേപങ്ങളിലൂടെ കര്ഷകരുടെ വരുമാനം ഉയര്ത്താന് സഹായിക്കും.
‘ഖേത് ബച്ചാവോ അഭിയാന്’
അസന്തുലിതമായ വളപ്രയോഗവും ഭൂഗര്ഭജലത്തിന്റെ അമിത ചൂഷണവും തടഞ്ഞ് കൃഷിഭൂമിയുടെ ആരോഗ്യം വീണ്ടെടുക്കാനാണ് ‘ഖേത് ബച്ചാവോ അഭിയാന്’ ആരംഭിച്ചത്. ഈ ക്യാമ്പെയ്ന് അഞ്ച് പ്രധാന സന്ദേശങ്ങള് മുന്നോട്ട് വെക്കുന്നു:
മണ്ണ് പരിശോധനയുടെ അടിസ്ഥാനത്തില് മാത്രം വളങ്ങള് ഉപയോഗിക്കുക. ഡിഎപി, യൂറിയ എന്നിവയുടെ അമിത ഉപയോഗം കുറച്ച്, സന്തുലിതമായ എന്പികെ, ജൈവ-നാനോ വളങ്ങള് എന്നിവ പ്രോത്സാഹിപ്പിക്കുക. പച്ചിലവളങ്ങളും സംയോജിത പോഷക പരിപാലനവും വര്ദ്ധിപ്പിക്കുക. വ്യാജ വിത്തുകള്, വളങ്ങള് എന്നിവയ്ക്കെതിരെ ജാഗ്രത പാലിക്കുകയും അധികൃതരെ അറിയിക്കുകയും ചെയ്യുക. പ്രകൃതിദത്ത കൃഷിയിലേക്കും കാലാവസ്ഥാ പ്രതിരോധ രീതികളിലേക്കും മാറുക. ഇത് ദീര്ഘകാലത്തേക്ക് മണ്ണ് സംരക്ഷിക്കാനും കൃഷിച്ചെലവ് കുറയ്ക്കാനും സഹായിക്കും.
ശാസ്ത്രവും ഡിജിറ്റല് കൃഷിയും
ശാസ്ത്രവും ഡിജിറ്റല് സാങ്കേതികവിദ്യയുമാണ് ഈ മുന്നേറ്റങ്ങളുടെ നട്ടെല്ല്. 2014-25 കാലയളവില് ഇന്ത്യന് കൗണ്സില് ഓഫ് അഗ്രികള്ച്ചറല് റിസര്ച്ച്, നാഷണല് അഗ്രികള്ച്ചറല് റിസര്ച്ച് സിസ്റ്റം എന്നിവ ചേര്ന്ന് വെള്ളപ്പൊക്കം, വറുതി, ഉഷ്ണതരംഗം എന്നിവയെ പ്രതിരോധിക്കുന്ന മൂവായിരത്തിനടുത്ത് കാലാവസ്ഥാപ്രതിരോധ വിള ഇനങ്ങളും 200ലധികം ബയോഫോര്ട്ടിഫൈഡ് ഇനങ്ങളും വികസിപ്പിച്ചു.
ഡിജിറ്റല് അഗ്രികള്ച്ചര് മിഷനിലൂടെ കര്ഷക ഐഡികള്, കൃഷിഭൂമികളുടെ ഡിജിറ്റൈസേഷന്, ഡ്രോണ് അധിഷ്ഠിത സേവനങ്ങള്, കാലാവസ്ഥാ നിര്ദ്ദേശങ്ങള് എന്നിവ ലഭ്യമാക്കുന്നു. ഇ-നാം, കിസാന് സാരഥി, കെ.വി.കെ എന്നിവയിലൂടെ ശാസ്ത്രജ്ഞരും കര്ഷകരും തമ്മിലുള്ള ദൂരം കുറഞ്ഞു. റോഡുകള്, വൈദ്യുതി, ഇന്റര്നെറ്റ്, സ്വയംസഹായ സംഘങ്ങള് എന്നിവ കാര്ഷിക വികസനത്തിനൊപ്പം ചേരുമ്പോഴാണ് ഗ്രാമീണ സാമൂഹിക പരിവര്ത്തനം സാധ്യമാകുന്നത്.
കര്ഷകരുടെ ആത്മവിശ്വാസത്തിലേക്ക്
വരും വര്ഷങ്ങളില് ആഗോള ഭക്ഷ്യകാലാവസ്ഥാ വെല്ലുവിളികള്ക്കിടയില് ഭാരതത്തിന് തങ്ങളുടെ കാര്ഷിക വ്യവസ്ഥയെ കൂടുതല് ശക്തിപ്പെടുത്തേണ്ടതുണ്ട്. കര്ഷകരുടെ വരുമാനം ഉയരുക, അവരുടെ കഠിനാധ്വാനത്തിന് അര്ഹമായ മൂല്യം ലഭിക്കുക, തന്ത്രപ്രധാന വിളകളില് സ്വയംപര്യാപ്തത നേടുക എന്നിവയാണ് പ്രധാന ലക്ഷ്യം.
പിഎം കിസാന്, പ്രകൃതിദത്ത കൃഷി, സാങ്കേതികവിദ്യ എന്നിവയിലൂടെ മണ്ണും കര്ഷകനും സംരക്ഷിക്കപ്പെടുന്നു. കൃഷിയിടം നിലനിന്നാല് മാത്രമേ കര്ഷകന് നിലനില്ക്കൂ; കര്ഷകന് നിലനിന്നാല് മാത്രമേ നമ്മുടെ ഭാവി സുരക്ഷിതമാകൂ.
കേവലം വിളകളുടെ അളവിനപ്പുറം കര്ഷകരുടെ ആത്മവിശ്വാസത്തിലേക്കും ഗ്രാമീണ ഭാരതത്തിന്റെ സമൃദ്ധിയിലേക്കും മുന്നേറുക എന്നതാണ് ഈ പുതിയ കാര്ഷിക പ്രയാണത്തിന്റെ അന്തസ്സത്ത.
