തൃശൂര്‍: ജില്ലാ പ്രസിഡന്റ് ഗോകുല്‍ ഗുരുവായൂരിനെതിരെ ഒരു വിഭാഗം കെ എസ് യു പ്രവര്‍ത്തകര്‍ ഡിസിസി ഓഫീസില്‍ കൊലവിളി മുദ്രാവാക്യം മുഴക്കിയതില്‍ നടപടിയെടുക്കാന്‍ ജില്ലാ കോണ്‍ഗ്രസ് കമ്മിറ്റി. അന്വേഷണ കമ്മീഷനായി സംഘടനാ ചുമതലയുള്ള ജനറല്‍ സെക്രട്ടറിമാരായ കെ കെ ബാബു, അഡ്വ. വി സുരേഷ് കുമാര്‍ എന്നിവരെ നിയോഗിച്ചു. രണ്ട് ദിവസത്തിനകം റിപ്പോര്‍ട്ട് നല്‍കണം.
ഒരുവിഭാഗം കെ എസ് യു പ്രവര്‍ത്തകരാണ് മുദ്രാവാക്യം മുഴക്കിയത്. ഗോകുല്‍ ഗുരുവായൂര്‍ രാജിവയ്‌ക്കണം എന്നാവശ്യപ്പെട്ടായിരുന്നു പ്രതിഷേധം. ഗോകുല്‍ ഗുരുവായൂരിന്റെ കയ്യും തലയും വെട്ടും എന്ന് മുദ്രാവാക്യം മുഴക്കി.
കെഎസ്യു ഓഫീസിന് മുന്നിലെ പ്രസിഡന്റിന്റെ ബോര്‍ഡ് അടിച്ചു തകര്‍ത്തു.കഴിഞ്ഞദിവസം ജില്ലാ ജനറല്‍ സെക്രട്ടറിയെ ഗോകുള്‍ അസഭ്യം വിളിക്കുന്ന ഓഡിയോ പുറത്തുവന്നിരുന്നു. കെസി വേണുഗോപാല്‍ വിഭാഗക്കാരനായ ഗോകുല്‍ മറു വിഭാഗക്കാരെ അപമാനിക്കുന്നുവെന്നാണ് എതിര്‍വിഭാഗം ആരോപിക്കുന്നത്.
