തൃശൂര്‍ : തൃപയാറില്‍ രൂപയ്ക്ക് പകരം ഡോളര്‍ മാറ്റിത്തരാമെന്ന് പറഞ്ഞ് വിളിച്ചുവരുത്തി ലക്ഷങ്ങള്‍ തട്ടിയെടുത്ത സംഭവത്തില്‍ കവര്‍ച്ചക്കാരുടെ ഇന്നോവ കാര്‍ അന്വേഷണസംഘം കണ്ടെത്തി. വലപ്പാട് പൂക്കോട്ട് ശിവക്ഷേത്രത്തിന് സമീപമാണ് ശനിയാഴ്ച രാവിലെ ആളൊഴിഞ്ഞ സ്ഥലത്ത് ഉപേക്ഷിക്കപ്പെട്ട നിലയില്‍ ഇന്നോവ കാര്‍ കണ്ടെത്തിയത്.കവര്‍ച്ചക്ക് ശേഷം പ്രതികള്‍ കാര്‍ വേഗത്തില്‍ ഓടിച്ചു പോകുന്ന സിസിടിവി ദൃശ്യങ്ങളും പുറത്തു ന്നു.
കഴിഞ്ഞ രാത്രിയോടെയാണ് പട്ടാമ്പി വിളയൂരിലെ കോണ്‍ഗ്രസ് പഞ്ചായത്തംഗം മുഹമ്മദ് റാഫി ഉള്‍പ്പെട്ട നാലംഗ സംഘം തൃപ്രയാറില്‍ എത്തിയത്. തൃപ്രയാര്‍ കിഴക്കേനട ആമലത്തു കുളങ്ങര ക്ഷേത്രത്തിന് സമീപം വച്ചാണ് ഇവര്‍ക്ക് നേരെ മുളകുപൊടി സ്‌പ്രേ ചെയ്ത് ആക്രമണം നടത്തി സംഘം കവര്‍ച്ച നടത്തിയത്. 16 ലക്ഷം രൂപ കവര്‍ന്നെന്നാണ് മുഹമ്മദ് റാഫിയും കൂട്ടരും മൊഴി നല്‍കിയത്. ഇവരോടൊപ്പം ഉണ്ടായിരുന്ന പെരുമ്പിലാവിലെ സിദ്ദിഖിന്റെ പരിചയത്തില്‍ ഉള്ള രഞ്ജിത് ആണ് ഡോളര്‍ മാറ്റി നല്‍കാമെന്ന് പട്ടാമ്പി സ്വദേശികളെ ധരിപ്പിച്ചിരുന്നത്.
കോണ്‍ഗ്രസ് പഞ്ചായത്ത് അംഗം മുഹമ്മദ് റാഫിയുടെ കാലില്‍ കത്തികൊണ്ട് മുറിവേല്‍പ്പിച്ചിട്ടുണ്ട്. രഞ്ജിത്ത് വയനാട്ടില്‍ സമാനമായ കുഴല്‍പ്പണ തട്ടിപ്പ് കേസില്‍ പ്രതിയാണെന്ന് പൊലീസ് നടത്തിയ അന്വേഷണത്തില്‍ കണ്ടെത്തി.
പ്രതിയെന്ന് സംശയിക്കുന്ന ഒരാളെയും ഇന്നോവ കാര്‍ വാടകയ്‌ക്ക് നല്‍കിയ രണ്ടുപേരെയും പൊലീസ് കസ്റ്റഡിയിലെടുത്ത് ചോദ്യം ചെയ്തു വരുന്നു.കോണ്‍ഗ്രസ് നേതാവ് ഉള്‍പ്പെട്ട പട്ടാമ്പി സ്വദേശികളായ സംഘം ഇതിനു മുന്‍പും ഡോളര്‍ ഇടപാടുകള്‍ നടത്തിയിട്ടുണ്ടോ എന്നും പരിശോധിക്കുന്നു.
