ടൊറന്റോ: ലോകകപ്പില് ആഫ്രിക്കന് ശക്തിയുടെ കരുത്തറിഞ്ഞ മറ്റൊരു മത്സരത്തില് (ഗ്രൂപ്പ് എല്) ഘാന പാനമയെ 1-0ന് പരാജയപ്പെടുത്തി. രണ്ടാം പകുതിയുടെ ഇഞ്ചുറി സമയത്ത് (90+4) കാലെബ് യെറങ്കിയാണ് ഘാനയ്ക്ക് ത്രസിപ്പിക്കുന്ന വിജയം സമ്മാനിച്ചത്. പരിക്ക് സമയം വരെ ടൂര്ണമെന്റിലെ തന്നെ മോശം പ്രകടനം എന്ന് വിലയിരുത്തപ്പെടാമായിരുന്ന കളിയെ വിജയത്തിലേക്ക് എത്തിക്കാന് ഘാനയുടെ സെന്റര് മിഡ്ഫീല്ഡറായ കാലെബ് യെറെങ്കിക്ക് സാധിച്ചു.
ആദ്യ പകുതിയില് പാനമയാണ് മികച്ച മുന്നേറ്റങ്ങള് നടത്തിയത്. കളിയുടെ രണ്ടാം മിനിറ്റില് തന്നെ പാനമയുടെ സ്ട്രൈക്കര് സിസിലിയോ വാട്ടര്മാന് തൊടുത്ത ശക്തമായ ഷോട്ട് ഘാന ഗോള് കീപ്പര് ലോറന്സ് അറ്റി ഗാരെ അക്രോബാറ്റിക് സേവിലൂടെ രക്ഷപ്പെടുത്തി. മഴ കാരണം ആദ്യ പകുതിയില് ഘാനയ്ക്ക് കാര്യമായ അവസരങ്ങള് സൃഷ്ടിക്കാനായില്ല. ആദ്യ 30 മിനിറ്റുകളില് പാനമ മധ്യനിര ഭരിച്ചപ്പോള് ഘാനയ്ക്ക് കളിയിലേക്ക് തിരിച്ചുവരാന് സമയമെടുത്തു. വിങ്ങര്മാരായ മൊഹമ്മദ് കുഡൂസും അന്റോയിന് സെമെന്യോയും ചില ഒറ്റപ്പെട്ട മുന്നേറ്റങ്ങള് നടത്തിയെങ്കിലും പാനമന് പ്രതിരോധക്കോട്ട തകര്ക്കാനായില്ല.
രണ്ടാം പകുതിയില് ഘാന ഗോള്കീപ്പര് അതി-സിഗെയെ പരിക്കുമൂലം മാറ്റി ബെഞ്ചമിന് അസാരെയെ കളത്തിലിറക്കി. പാനമയുടെ ക്രിസ്റ്റ്യന് മാര്ട്ടിനെസിന് ലഭിച്ച സുവര്ണാവസരം സൈഡ് നെറ്റില് തട്ടി പുറത്തുപോയി. മത്സരം സമനിലയിലേക്ക് നീങ്ങുമെന്ന് കരുതിയ ഘട്ടത്തിലാണ് 90+4-ാം മിനിറ്റില് ഘാനയുടെ കൗണ്ടര് അറ്റാക്ക് എത്തിയത്. ഇടതുവിങ്ങിലൂടെ പന്തുമായി മുന്നേറിയ പകരക്കാരന് താരം ബ്രാന്ഡര് തോമസ് അസാന്റെ ബോക്സിനുള്ളിലേക്ക് നല്കിയ കൃത്യമായ പാസ് ഒട്ടും പാഴാക്കാതെ കാലെബ് യെറെങ്കി പാനമന് വലയിലാക്കി. യെറേങ്കിയുടെ ആദ്യ അന്താരാഷ്ട്ര ഗോളാണിത്. ഈ വിജയത്തോടൊപ്പം ഗ്രൂപ്പ് എലില് ഇംഗ്ലണ്ടിനൊപ്പം മൂന്ന് പോയിന്റുമായി ഘാന മുന്നിലെത്തി.
