കൊല്ലം: നാവു കറുക്കും വരെ രുചിയോടെ നുണയാന് തമിഴ്നാട്ടില് നിന്നും ആന്ധ്രയില് നിന്നും ഞാവല് പഴങ്ങള് എത്തി. ഔഷധ ഗുണവും രുചിയും ഏറെയുള്ള ഞാവല് പഴത്തിന് ഇപ്പോള് വിപണിയില് വന് ഡിമാന്ഡാണ്. എന്നാല് രുചി അറിയണമെങ്കില് വില അല്പം കടുപ്പമാണ്. കിലോയ്ക്ക് 400 രൂപ നല്കണം. ഒരുകാലത്ത് നാട്ടില് ആര്ക്കും വേണ്ടാതെ പക്ഷികള്ക്ക് തീറ്റയായി മാറിയിരുന്ന ഞാവല് പഴമാണ് ഇപ്പോള് തമിഴ്നാട്ടിലെ തിരുനെല്വേലി, പൊള്ളാച്ചി എന്നിവിടങ്ങളില് നിന്ന് ലോഡ് കണക്കിന് എത്തിച്ച് വഴിയോരങ്ങളില് വില്പന നടത്തുന്നത്.
പ്രധാന റോഡുകളിലും ഇടറോഡുകളിലും തമിഴ്നാട്ടില് നിന്നുള്ള നിരവധി വഴിയോര വില്പനക്കാരാണ് ഇപ്പോള് തമ്പടിച്ചിരിക്കുന്നത്. നിത്യേന ദീര്ഘദൂര ബസുകളിലും പിക്കപ് വാനുകളിലുമായാണ് ഇവര്ക്കുള്ള ഞാവല് പഴം ലോഡ് എത്തുന്നത്. നാട്ടിന്പുറങ്ങളില് സുലഭമായിരുന്ന ഞാവല് മരങ്ങള് ഇന്ന് അപ്രത്യക്ഷമായ അവസ്ഥയിലാണ്. എങ്കിലും ഞാവല് പഴത്തോടുള്ള പ്രിയം മലയാളികള് മറന്നിട്ടില്ലെന്നു മനസ്സിലാക്കിയാണ് അന്യസംസ്ഥാനങ്ങളില് നിന്ന് വലിയ വിലയില് ഇവ വിപണി കീഴടക്കാന് എത്തിച്ചിരിക്കുന്നത്.
മീനം, മേടം മാസങ്ങളിലാണ് ഞാവല് മരങ്ങള് പൂക്കുന്നത്. പഴം പാകമാകുന്നതോടെ മരത്തിനടിയില് വലിയ വലവിരിച്ചാണ് ഇവ കേടുപാടുകളില്ലാതെ ശേഖരിക്കുന്നത്. പഴം മാത്രമല്ല, ഇതിന്റെ കുരുവും ഔഷധമൂല്യമുള്ളതാണ്. അതിനാല് വില അല്പം കൂടുതലാണെങ്കിലും ഞാവല് പഴം വാങ്ങാന് ഒട്ടേറെ പേരാണ് എത്തു ന്നത്.
നിത്യേന ആയിരക്കണക്കിന് രൂപയുടെ കച്ചവടമാണ് ഓരോരുത്തരും നടത്തുന്നത്. ഏകദേശം 15 കിലോ വരെ ഒരു ദിവസം വിറ്റുപോകുന്നുണ്ടെന്നും അടുത്ത മാസം വരെ സീസണ് തുടരുമെന്നുമാണ് വ്യാപാരികള് പറയുന്നത്. വിളഞ്ഞു പാകമായി കറുപ്പ് നിറമാകുന്ന പഴങ്ങള് പെട്ടെന്ന് ചീഞ്ഞുപോകാന് സാധ്യതയുള്ളതിനാല് അതീവ ശ്രദ്ധയോടെയാണ് വ്യാപാരികള് ഇവ കൈകാര്യം ചെയ്യുന്നത്. ഇതു കൊണ്ടാണ് ചില്ലറ വിപണിയില് ഇതിന്റെ വില എപ്പോഴും ഉയര്ന്ന നിലയില് തുടരുന്നത്.
ഞാവലിന്റെ ആരോഗ്യ ഗുണങ്ങള്
ഹൃദയാരോഗ്യം: ഹൃദയാരോഗ്യത്തിന് ഞാവല്പ്പഴത്തിലെ ആന്റി ഓക്സിഡന്റുകള് നല്ലതാണ്. ഇതിലെ ഡയറ്റെറി ഫൈബര് കൊളസ്ട്രോള് കുറയ്ക്കാന് ഏറെ സഹായിക്കുന്നു. ഞാവലില് അടങ്ങിയ പൊട്ടാസ്യം സ്ട്രോക്ക് തടയാമ്പും ബിപി കുറയ്ക്കാനും ഹൃദയ പ്രശ്ങ്ങള് തടയാനുമെല്ലാം ഏറെ നല്ലതാണ്.
പ്രമേഹ നിയന്ത്രണം: ഞാവല്ക്കുരു ഉണക്കിപ്പൊടിച്ച് അര ടീസ്പൂണ് രാവിലെ വെറും വയറ്റില് വെള്ളത്തില് ചേര്ത്ത് കഴിയ്ക്കുന്നത് പ്രമേഹത്തിന് നല്ല മരുന്നാണ്. മാത്രമല്ല ഇന്സുലിന് ഉല്പാദനത്തിന് സഹായിക്കുന്ന ഒന്ന് കൂടിയാണ് ഇത്. ഞാവല്ക്കുരു മാത്രമല്ല പഴം തന്നെയായി കഴിക്കുന്നതും നല്ലതാണ്.
കുടലിന്റെ ആരോഗ്യം: കുടലിന്റെ ആരോഗ്യത്തിന് മികച്ചതാണ് ഞാവല്പ്പഴം. ഇതിന്റെ ഇല ചവച്ചരച്ച് കഴിയ്ക്കുന്നത് ദഹനത്തിന് സഹായിക്കുന്നു. പൈല്സ് പോലുള്ള രോഗങ്ങള്ക്ക് മരുന്നാണ്. മലബന്ധം മാറാനുംദഹനക്കേടിന് പരിഹാരമായും പ്രവര്ത്തിക്കുന്നു. ഇതില് നാരുകള് അടങ്ങിയതിനാല് ഗ്യാസ്, അസിഡിറ്റി പ്രശ്നങ്ങള്ക്കും നല്ലൊരു മരുന്നാണ്. കലോറി കുറഞ്ഞതിനാല് തടി കുറയ്ക്കാനും ഏറെ സഹായിക്കുന്നു.
ചര്മത്തിന്റെ ആരോഗ്യം: ചര്മരോഗ്യത്തിന് മികച്ചതാണ് ഞാവല്പ്പഴം. ഇതിലെ ആന്റി ഓക്സിഡന്റുകളും വൈറ്റമിന് എയുമാണ് ഗുണം നല്കുന്നത്. അയേണ് അടങ്ങിയതിനാല് ഇത് നിറം വര്ദ്ധിക്കാന് സഹായിക്കുന്നു.
