ഭോപ്പാല്‍: പാകിസ്ഥാന്‍ ബന്ധമുള്ള ലോണ്‍ വൂള്‍ഫ് ശൃംഖലയില്‍പ്പെട്ട ഒരാള്‍ കൂടി അറസ്റ്റില്‍. മദ്രസ അദ്ധ്യാപകനായ ഇസ്ഹാര്‍-ഉള്‍-ഹഖ് (65) ആണ് പിടിയിലായത്. ബീഹാറിലെ മധുബനിയില്‍ മധ്യപ്രദേശ്, ബീഹാര്‍ ഭീകരവിരുദ്ധ സേനകള്‍ (എടിഎസ്) സംയുക്തമായി നടത്തിയ ഓപ്പറേഷനിലൂടെയാണ് ഇയാളെ പിടികൂടിയത്.
പാകിസ്ഥാന്‍ ആസ്ഥാനമായുള്ള ഹാന്‍ഡലറുമായി ഹഖിന് ബന്ധമുണ്ടെന്ന് അന്വേഷണത്തില്‍ വ്യക്തമായതിന് പിന്നാലെയാണ് അറസ്റ്റ്.
രാജ്യത്തുടനീളമുള്ള പുരുഷന്മാരെ ശൃംഖലയിലേക്ക് റിക്രൂട്ട് ചെയ്യുന്നതിനും ആക്രമണങ്ങള്‍ ആസൂത്രണം ചെയ്യുന്നതിനും ഇയാളെ മൊഡ്യൂളിന്റെ നേതാവായി നിയമിച്ചിരുന്നതായി ബീഹാര്‍ എടിഎസിന്റെ എഡിജി പങ്കജ് കുമാര്‍ ദരാദ് വ്യക്തമാക്കി. ഹഖ് ഉള്‍പ്പെടെ ലോണ്‍ വൂള്‍ഫ് ഭീകര ശൃംഖലയുമായി ബന്ധമുള്ള നാല് പേര് ഇതുവരെ അറസ്റ്റിലായിട്ടുണ്ട്.
പഴനിയിലെ ഖാസി ക്യാമ്പ് ഏരിയയിലെ ഹോമിയോ ക്ലിനിക്കില്‍ ജോലി ചെയ്തിരുന്ന മുഹമ്മദ് ഫറാസ് (35), ഉത്തര്‍പ്രദേശിലെ സഹാറന്‍പുരില്‍ നിന്നുള്ള നയിം അബ്ദുള്ള ഖുറേഷി (38), രാജസ്ഥാന്‍-ഹരിയാന അതിര്‍ത്തിക്കടുത്തുള്ള ആല്‍വാറില്‍ നിന്നുള്ള മുഹമ്മദ് ഷാക്കിര്‍ മേവ് (34) എന്നിവരാണ് അറസ്റ്റിലായ മറ്റ് മൂന്ന് പേര്. മൊഡ്യൂളിന്റെ വ്യാപ്തി വ്യക്തമാകുന്നതിനായി ഹഖ് ഉള്‍പ്പെടെയുള്ളവരെ ചോദ്യം ചെയ്ത് വരികയാണ്.
