ഒഡീഷ ; കരയാക്രമണത്തിന് തദ്ദേശീയമായി വികസിപ്പിച്ച ദീർഘദൂര ക്രൂസ് മിസൈലിന്റെ (എൽആർഎൽഎസിഎം) പരീക്ഷണ പറക്കൽ വിജയം. ഒഡീഷ തീരത്തെ ഡോ.എപിജെ അബ്ദുൾ കലാം ദ്വീപിൽനിന്നായിരുന്നു വിക്ഷേപണം. ചാന്ദിപ്പൂരിലെ ഇന്റഗ്രേറ്റഡ് ടെസ്റ്റ് റേഞ്ചിൽ വിന്യസിച്ചിരിക്കുന്ന വിവിധ ട്രാക്കിംഗ് ഉപകരണങ്ങളിൽ നിന്ന് ലഭിച്ച ഡാറ്റ അനുസരിച്ച് , എല്ലാ ലക്ഷ്യങ്ങളും കൃത്യമായി ഭേദിച്ചു.
എൽആർഎൽഎസിഎമ്മിന്റെ എല്ലാ ഉപസംവിധാനങ്ങളും വിവിധ ഡിആർഡിഒ ലബോറട്ടറികളും ഇന്ത്യൻ വ്യവസായ പങ്കാളികളും വികസിപ്പിച്ചെടുത്തതാണ്.ബെംഗളൂരുവിലെ എയറോനോട്ടിക്കൽ ഡെവലപ്മെന്റ് എസ്റ്റാബ്ലിഷ്മെന്റ് ആണ് ഇതിന്റെ നോഡൽ ലബോറട്ടറി. മുതിർന്ന ഡിആർഡിഒ ഉദ്യോഗസ്ഥരും ഇന്ത്യൻ നാവികസേനയിലെയും വ്യോമസേനയിലെയും പ്രതിനിധികളും വിക്ഷേപണത്തിൽ പങ്കെടുത്തു.
കരയിലുള്ള ലക്ഷ്യങ്ങൾക്കെതിരെ ദീർഘദൂര ആക്രമണ ശേഷി സായുധ സേനയ്ക്ക് നൽകുന്ന രീതിയിലാണ് മിസൈൽ രൂപകൽപ്പന ചെയ്തിരിക്കുന്നത്.മിസൈൽ അതിന്റെ എല്ലാ ലക്ഷ്യങ്ങളും വിജയകരമായി കൈവരിച്ചതായി പ്രതിരോധ മന്ത്രാലയം അറിയിച്ചു.
