കൊല്ക്കത്ത: ടിഎംസി നേതാക്കള് വിമതപക്ഷം ചേരുന്ന മുറയ്ക്ക് പുതിയ നേതാക്കളെ പകരം നിയമിക്കുന്ന പങ്കപ്പാടിലാണ് മമതാ ബാനര്ജി. യുവജന വിഭാഗം പ്രസിഡന്റ് സായോണി ഘോഷ് വിമത പക്ഷം ചേര്ന്നതോടെ മറ്റൊരു യുവ നേതാവായ അര്ണാബ് ബാനര്ജിയെ ആ സ്ഥാനത്ത് നിയോഗിച്ചു. ഒരാഴ്ച മുന്പാണ് സായോണിയെ പ്രസിഡന്റാക്കിയത്.
പാര്ട്ടി വനിതാ വിഭാഗമായ തൃണമൂല് മഹിളാ കോണ്ഗ്രസിന്റെ പ്രസിഡന്റ് മാല റോയി എംപിയും കളംവിട്ടതോടെ കാളിഗഞ്ചില് നിന്നുള്ള ടിഎംസി എംഎല്എ അലിഫ അഹമ്മദിനെ പകരം നിയമിച്ചിട്ടുണ്ട്. ലോക്സഭയിലും പാര്ട്ടി വലിയ പ്രതിസന്ധി നേരിടുന്നതിനിടെയാണ് സായോണി ഘോഷും മാല റോയിയും വിമത എംപിമാരുടെ സംഘത്തില് ചേര്ന്നത്. പാര്ട്ടിയിലെ 28 ലോക്സഭാ അംഗങ്ങളില് 20 പേര് ഇതിനകം വിമതപക്ഷത്താണ്.
അതിനിടെ നിയമസഭാ തെരഞ്ഞെടുപ്പില് പാര്ട്ടിക്കേറ്റ കനത്ത പരാജയത്തെത്തുടര്ന്ന്, ‘യഥാര്ത്ഥ ടിഎംസി’ ആയി അംഗീകരിക്കണമെന്ന് ആവശ്യപ്പെട്ട് തിങ്കളാഴ്ച സ്പീക്കര് ഓം ബിര്ളയെ കാണുമെന്ന് വിമതര് അറിയിച്ചു.
















