ന്യൂഡൽഹി : നാവികസേനയുടെ കരുത്ത് ഇരട്ടിയാക്കാൻ 36,000 കോടി രൂപയുടെ സ്കോർപീൻ അന്തർവാഹിനി പദ്ധതിയുമായി ഇന്ത്യ . ഒമാൻ ഉൾക്കടൽ പോലുള്ള പ്രധാന സമുദ്രമേഖലകളിൽ പ്രശ്നങ്ങൾ രൂക്ഷമാകുന്ന പശ്ചാത്തലത്തിലാണ് പുതിയ നീക്കം .
മൂന്ന് സ്കോർപീൻ അന്തർവാഹിനികൾ വാങ്ങാനുള്ള ഇന്ത്യൻ നാവികസേനയുടെ പദ്ധതിയാണ് ഇപ്പോൾ ചർച്ചയാകുന്നത്. ഈ അന്തർവാഹിനികൾ സർക്കാർ ഉടമസ്ഥതയിലുള്ള മസഗോൺ ഡോക്ക് ലിമിറ്റഡും (എംഡിഎൽ) ഫ്രഞ്ച് പ്രതിരോധ ഭീമനായ നേവൽ ഗ്രൂപ്പും സംയുക്തമായി നിർമ്മിക്കും.
രണ്ട് വർഷം മുമ്പ് ഏകദേശം 36,000 കോടി രൂപയുടെ കരാർ പ്രതിരോധ മന്ത്രാലയം അംഗീകരിച്ചെങ്കിലും, സാങ്കേതിക, വാണിജ്യ സങ്കീർണ്ണതകൾ കാരണം ചർച്ചകൾ വൈകിയിരുന്നു . പൈതൃക അന്തർവാഹിനികളുടെ വിരമിക്കൽ സാധ്യതയും ഇന്ത്യൻ മഹാസമുദ്ര മേഖലയിലെ വർദ്ധിച്ചുവരുന്ന സമുദ്ര വെല്ലുവിളികളും കണക്കിലെടുത്താണ് വീണ്ടും പദ്ധതി സജീവമാക്കുന്നത്. നേവൽ ഗ്രൂപ്പുമായി സഹകരിച്ച് പ്രോജക്റ്റ് 75 പ്രകാരം ഇന്ത്യ ഇതിനകം ആറ് സ്കോർപീൻ അന്തർവാഹിനികൾ നിർമ്മിച്ചിട്ടുണ്ട്.
