കൊച്ചി: കുട്ടികളുടെ സുരക്ഷയ്ക്കും സംരക്ഷണത്തിനുമായി രണ്ട് പതിറ്റാണ്ടിലേറെയായി കേരളത്തില് പ്രവര്ത്തിച്ചുവരുന്ന സംഘടനയായ സൗരക്ഷിക നല്കുന്ന ഈ വര്ഷത്തെ പഞ്ചമി പുരസ്കാരത്തിന് പ്രമുഖ ആദിവാസി- ദളിത് സാമൂഹ്യപ്രവര്ത്തകന് കെ.എസ്. രാജേന്ദ്രപ്രസാദ് അര്ഹനായി.
കേരളത്തിലെ ആദിവാസി കുട്ടികളുടെ ക്ഷേമത്തിനായും ബാലാവകാശ സംരക്ഷണത്തിനായും നടത്തിവരുന്ന ശക്തമായ ഇടപെടലുകളും സ്തുത്യര്ഹമായ സേവനങ്ങളുമാണ് പുരസ്കാരത്തിന് അര്ഹനാക്കിയതെന്ന് സൗരക്ഷിക സംസ്ഥാന സെക്രട്ടറി അഡ്വ. എസ്. പ്രേംകുമാര്, സംസ്ഥാന ഉപാധ്യക്ഷ ആര്. സുധാകുമാരി എന്നിവര് വാര്ത്താസമ്മേളനത്തില് പറഞ്ഞു.
ജൂണ് 16 ന് വൈകിട്ട് 3.30 ന് എറണാകുളം ഇടപ്പള്ളി ചങ്ങമ്പുഴ പാര്ക്കില് നടക്കുന്ന ചടങ്ങില് പുരസ്കാരം സമര്പ്പിക്കും. കേരള ഹൈക്കോടതി റിട്ട. ജഡ്ജി ജസ്റ്റിസ് വി.ജി. അരുണ് പുരസ്കാര സമര്പ്പണവും ഉദ്ഘാടനവും നിര്വഹിക്കും. സൗരക്ഷിക സംസ്ഥാന പ്രസിഡന്റ് അഡ്വ. എം. ശശിശങ്കര് ചടങ്ങില് അധ്യക്ഷത വഹിക്കും. പ്രമുഖ രാഷ്ട്രീയ നിരീക്ഷകന് അഡ്വ. എ. ജയശങ്കര് മുഖ്യാതിഥിയായിരിക്കും. മഹാത്മാ അയ്യന്കാളി ‘പഞ്ചമി’ എന്ന ബാലികയെ മുന്നിര്ത്തി 1914 ജൂണ് 16 ന് നടത്തിയ ചരിത്രപ്രസിദ്ധമായ വിദ്യാഭ്യാസ സമരത്തിന്റെ സ്മരണാര്ത്ഥമാണ് സൗരക്ഷിക ഈ ദിവസം ‘ബാലാവകാശ ദിനമായി’ ആചരിക്കുന്നത്. ബാലാവകാശങ്ങള്ക്കായി വിശിഷ്ട സേവനം അനുഷ്ഠിക്കുന്ന വ്യക്തികള്ക്കാണ് ഈ ദിനത്തില് ‘പഞ്ചമി പുരസ്കാരം’ നല്കി വരുന്നത്.
ലഗോകുലം സംസ്ഥാന പ്രസിഡന്റ് ആര്. പ്രസന്നകുമാര്, കെപിഎംഎസ് സംസ്ഥാന കമ്മിറ്റി അംഗം എം. രവി, ബിപിജെഎസ് എറണാകുളം ജില്ലാ പ്രസിഡന്റ് ഷൈജു കവനാട്ടില് എന്നിവര് ചടങ്ങില് ആശംസകള് അര്പ്പിക്കും. സൗരക്ഷിക സംസ്ഥാന സെക്രട്ടറി അഡ്വ. എസ്. പ്രേംകുമാര് സ്വാഗതവും, എറണാകുളം ജില്ലാ പ്രസിഡന്റ് വിദ്യാധരന് പി. മേനോന് നന്ദിയും പറയും. പുരസ്കാര ജേതാവ് കെ.എസ്. രാജേന്ദ്രപ്രസാദ് മറുപടി പ്രസംഗം നടത്തും. സൗരക്ഷിക എറണാകുളം ജില്ലാ പ്രസിഡന്റ് വിദ്യാധരന് പി. മേനോന്, എറണാകുളം ജില്ലാ സെക്രട്ടറി വി.എന്. സന്തോഷ്കുമാര് എന്നിവരും വാര്ത്താസമ്മേളനത്തില് പങ്കെടുത്തു.
