ന്യൂദല്ഹി: ഗ്രാമവികസനം ലക്ഷ്യമിട്ടുള്ള ‘വികസിത് ഭാരത് ഗ്രാം-ജി’ ജൂലൈ ഒന്നിന് നടപ്പാക്കും. പദ്ധതിക്ക് 1.25 ലക്ഷം കോടിയാണ് വകയിരുത്തിയിട്ടുള്ളത്.
പദ്ധതി കോടിക്കണക്കിന് തൊഴിലാളികളുടെ ജീവിതവുമായും ഉപജീവനവുമായും ബന്ധപ്പെട്ട പ്രശ്നമാണെന്നും അതിനാല് ഒരു തൊഴിലാളിയും ഒരു ദിവസം പോലും ജോലിയില്ലാതെ കഴിയേണ്ടി വരരുതെന്നും കേന്ദ്രമന്ത്രി ശിവരാജ് സിങ് ചൗഹാന് ഇതുമായി ബന്ധപ്പെട്ട യോഗത്തില് പറഞ്ഞു. തൊഴിലവസരങ്ങള് സൃഷ്ടിക്കുന്നതിലോ വേതനം നല്കുന്നതിലോ നിയമപരമായ അവകാശങ്ങളിലോ ഉണ്ടാകുന്ന യാതൊരുവിധ തടസങ്ങളും അംഗീകരിക്കാനാവില്ല.
മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിക്ക് കീഴില് കേന്ദ്ര ഗവണ്മെന്റ് ഇതിനകം 30,000 കോടി രൂപ അനുവദിച്ചതായി അദ്ദേഹം അറിയിച്ചു. ഇതിന് പുറമെ സംസ്ഥാനങ്ങള്ക്കും കേന്ദ്രഭരണ പ്രദേശങ്ങള്ക്കും 95,692 കോടി രൂപയുടെ ഇടക്കാല വിഹിതവും അനുവദിച്ചിട്ടുണ്ട്. ഇതോടെ ആകെ വിഹിതം 1.25 ലക്ഷം കോടി രൂപ കവിയും.
തുക രാജ്യത്തെ ഏകദേശം 2.80 ലക്ഷം ഗ്രാമപഞ്ചായത്തുകളിലെത്തുമെന്നും ഓരോ പഞ്ചായത്തിനും ലക്ഷക്കണക്കിന് രൂപയുടെ സാമ്പത്തിക വിഹിതം ലഭിക്കുമെന്നും അദ്ദേഹം വ്യക്തമാക്കി. കേരളത്തിന് 3,136.44 കോടി രൂപയാണ് അനുവദിച്ചത്. ലക്ഷദ്വീപിന് 0.32 കോടി രൂപയും അനുവദിച്ചിട്ടുണ്ട്. സംസ്ഥാനങ്ങളുടെ ആകെ വിഹിതം 92,550.17 കോടിയായി. കേന്ദ്രഭരണ പ്രദേശങ്ങളുടെ ആകെ വിഹിതം 1,291.32 കോടിയുമായി.
സംസ്ഥാനങ്ങള്ക്കും കേന്ദ്രഭരണ പ്രദേശങ്ങള്ക്കും അനുവദിച്ച ഈ തുകയ്ക്ക് പുറമെ കേന്ദ്ര ഭരണനിര്വഹണത്തിനും സാമൂഹ്യ ഓഡിറ്റിനും 1,850.62 കോടിയും നീക്കിവെച്ചിട്ടുണ്ട്. ഇതോടെ ആകെ ഇടക്കാല വിഹിതം 95,692.31 കോടിയാകും.
