ഹൈദരാബാദ്: താൻ മുൻപ് തികച്ചും വ്യത്യസ്തമായ ഒരു പാത തിരഞ്ഞെടുക്കാനിരുന്നതാണെന്നും എന്നാൽ തന്റെ ജ്യേഷ്ഠനും മെഗാസ്റ്റാറുമായ ചിരഞ്ജീവിയാണ് തന്നെ തിരികെ കൊണ്ടുവന്നതെന്നും ആന്ധ്രാപ്രദേശ് ഉപമുഖ്യമന്ത്രി കൂടിയായ പവൻ കല്യാൺ.
താൻ നക്സലൈറ്റ് പ്രസ്ഥാനത്തിൽ ചേരാൻ ഏറെക്കുറെ തീരുമാനിച്ചിരുന്നുവെന്നും അതിൽ നിന്നും പിന്മാറുന്നതിന് മുൻപ് ചില പൊതുയോഗങ്ങളിൽ വരെ പങ്കെടുത്തിരുന്നുവെന്നും പവൻ കല്യാൺ പങ്കുവെച്ചത്. എഎൻഐ പോഡ്കാസ്റ്റിനിടെയായിരുന്നു ഈ വെളിപ്പെടുത്തലുകൾ.
“ഒരു ഘട്ടത്തിൽ ഞാൻ നക്സലൈറ്റ് ആവുന്നതിനെ കുറിച്ചു പോലും ആലോചിച്ചിരുന്നു. എന്റെ കൗമാരത്തിന്റെ അവസാനത്തിൽ… തോക്കെടുക്കാൻ ഞാൻ ആഗ്രഹിച്ചു. ആ സമയത്താണ് കൂടുതൽ ക്രിയാത്മകമായ മറ്റൊന്നിലേക്ക് എന്റെ സഹോദരൻ എന്നെ നയിച്ചത്. ‘നിന്റെ ഉള്ളിലെ ഈ ഭ്രാന്തമായ ദേഷ്യം എവിടെ നിന്നാണ് വരുന്നത്?’ എന്ന് അദ്ദേഹം ചോദിച്ചു. ‘ഞാൻ അനീതിയെക്കുറിച്ചാണ് സംസാരിക്കുന്നത്, നമ്മൾ അത് ചെയ്യണം, ഇത് ചെയ്യണം’ എന്ന് ഞാൻ മറുപടി നൽകി. അദ്ദേഹത്തിന് വലിയ ആശങ്കയുണ്ടായിരുന്നു. 17 മുതൽ 21 വയസ്സുവരെ ആ മാനസികാവസ്ഥ നീണ്ടുനിന്നു. ആ പ്രായത്തിലാണ് ആളുകൾ ഇത്തരം കാര്യങ്ങളിലേക്ക് എടുത്തുചാടുന്നത്.”
തന്നെയാരും അറിയാത്ത വിദ്യാർത്ഥി കൂട്ടായ്മകളിൽ പവൻ കല്യാൺ പങ്കെടുക്കുമായിരുന്നു. ഡോക്യുമെന്ററികൾ നിർമ്മിക്കുന്നതിനായി മുംബൈയിലെ ഷോർട്ട് ഫിലിം ഫെസ്റ്റിവലുകളിലും പവൻ കല്യാൺ പങ്കെടുത്തിട്ടുണ്ട്. താൻ പല പരീക്ഷണങ്ങളും നടത്തുകയായിരുന്നുവെന്നും എന്നാൽ ഒന്നിനും ഒരു സന്തോഷം തോന്നിയില്ലെന്നും എവിടെയോ കുടുങ്ങിപ്പോയതുപോലെ കടുത്ത ദേഷ്യം തോന്നിയെന്നും പവൻ കല്യാൺ കൂട്ടിച്ചേർത്തു.
ആ സമയത്താണ് എന്റെ സഹോദരൻ ഇടപെടുന്നത്. അദ്ദേഹം ഒരൊറ്റ കാര്യം മാത്രമാണ് ചോദിച്ചത്. ‘നിന്റെ സഹോദരൻ ചിരഞ്ജീവി അല്ലായിരുന്നുവെങ്കിൽ, നിനക്ക് കുടുംബത്തോട് ചില ഉത്തരവാദിത്തങ്ങൾ ഉണ്ടായിരുന്നുവെങ്കിൽ, നിന്റെ ശമ്പളത്തെയും കഠിനാധ്വാനത്തെയും ആശ്രയിച്ചാണ് ആരെങ്കിലും ജീവിക്കുന്നതെങ്കിൽ നീ ഇതേ കാര്യം ചെയ്യുമോ?’ എനിക്ക് മറുപടിയില്ലായിരുന്നു. എനിക്ക് അതിന് ഉത്തരമില്ലാത്തതിനാൽ ഞാൻ നിശബ്ദനായി,” പവൻ കല്യാണിന്റെ വാക്കുകളിങ്ങനെ.
കഴിഞ്ഞ വർഷം പുറത്തിറങ്ങിയ ‘ഹരി ഹര വീര മല്ലു’, ‘ദേ കോൾ ഹിം ഒജി (OG)’ എന്നീ ചിത്രങ്ങളിലാണ് പവൻ കല്യാൺ അവസാനമായി അഭിനയിച്ചത്. 2026-ൽ ‘ഉസ്താദ് ഭഗത് സിംഗ്’ എന്ന ചിത്രത്തിലും അദ്ദേഹം പ്രത്യക്ഷപ്പെട്ടു. സുരേന്ദർ റെഡ്ഡി സംവിധാനം ചെയ്യുന്ന പേരിടാത്ത ചിത്രത്തിലാണ് പവൻ കല്യാൺ അടുത്തതായി അഭിനയിക്കുന്നത്. നിലവിൽ മറ്റ് പുതിയ പ്രോജക്ടുകളൊന്നും പ്രഖ്യാപിച്ചിട്ടില്ല.
