കൊച്ചി: രഹ്ന ഫാത്തിമയുടെ മുൻ ജീവിത പങ്കാളി മനോജ് ശ്രീധർ നിര്യാതനായി. മുൻ പങ്കാളി ആയിരുന്ന രഹ്ന ഫാത്തിമ തന്നെയാണ് മനോജിന്റെ മരണവിവരം ഫേസ്ബുക്കിലൂടെ അറിയിച്ചത്. ഏറെ നാളായി ഒരു അപകടത്തിൽപ്പെട്ട മനോജ് ഗുരുതരാവസ്ഥയിൽ ചികിത്സയിലായിരുന്നു. കേരളത്തിൽ നിന്നും കാശ്മീരിലേക്കുള്ള ബൈക്ക് യാത്രക്കിടെ പഞ്ചാബിൽ വെച്ച് അപകടത്തിൽ പെട്ടാണ് മനോജിന് അഞ്ചുവർഷം മുൻപ് ഗുരുതരമായ അവസ്ഥ ഉണ്ടായത്. മനോജും രഹ്നയ്ക്ക് ശേഷമുള്ള ജീവിതപങ്കാളി അഞ്ജലിയും ഇന്ത്യയിലെ വിവിധ ഇടങ്ങളിൽ ബൈക്കിൽ യാത്ര ചെയ്തു വരികയായിരുന്നു.
കാശ്മീർ ലക്ഷ്യമാക്കിയുള്ള യാത്രയിലെ വിവരങ്ങൾ ഇവർ വ്ളോഗിലൂടെ പങ്കുവെക്കുകയും ചെയ്തിരുന്നു. പഞ്ചാബിലെ ഫരിദ്കോട്ട് എന്ന സ്ഥലത്തുവെച്ച് ഇവർ സഞ്ചരിച്ച ബൈക്ക് അപകടത്തിൽ പെടുകയായിരുന്നു. അപകടത്തിൽ അടിവയറ്റിനാണ് മനോജിന് പരിക്കേറ്റത്. രക്തസ്രാവം ഉണ്ടായതിനെ തുടർന്ന് ഓപ്പറേഷൻ നടത്തുകയും വൻകുടലിലെ ചതഞ്ഞ ഭാഗം നീക്കം ചെയ്യുകയും ചെയ്ത സാഹചര്യമായിരുന്നു.
തുടർന്ന് അപകടനില തരണം ചെയ്ത മനോജിന് സാമ്പത്തികമായി സുഹൃത്തുക്കളും പരിചയക്കാരും സഹായിച്ചാണ് ചികിത്സ നടത്തിയിരുന്നത്.ഇടയ്ക്കിടെ തന്റെ അവസ്ഥയെ കുറിച്ച് നിസ്സഹായനായി മനോജ് പോസ്റ്റ് ഇടാറുണ്ടായിരുന്നു. ശബരിമലയിൽ കയറാനായി പോയ രഹ്ന ഫാത്തിമയ്ക്ക് അന്ന് മനോജ് പൂർണ്ണ പിന്തുണ നൽകിയിരുന്നു. പിന്നീട് രഹ്നയുടെ ജോലി പോയതോടെ മനോജ് അവരിൽ നിന്നും വേർപിരിഞ്ഞ് അഞ്ജലി എന്ന യുവതിയുമായി താമസിക്കുകയായിരുന്നു.
