കൊച്ചി: ശബരിമല സ്വര്ണക്കൊള്ള കേസില് കുറ്റപത്രം ഉടന് സമര്പ്പിക്കുമെന്ന് പ്രത്യേക അന്വേഷണ സംഘം ഹൈക്കോടതിയെ അറിയിച്ചു.അന്വേഷണം അവസാന ഘട്ടത്തിലാണ്. അന്വേഷണത്തില് ഹൈക്കോടതി തൃപ്തി രേഖപ്പെടുത്തി.
അതേസമയം, വിഗ്രഹങ്ങള്ക്ക് പിന്നില് സ്ഥാപിക്കുന്ന പ്രഭാ മണ്ഡലത്തില് പരിശോധന നടത്താന് ഹൈക്കോടതി അനുമതി നല്കി. പ്രഭാമണ്ഡലത്തിന്റെയും വാതിലിന്റെ മുകള് ഭാഗത്തെയും പാളികള് ഇളക്കി സാമ്പിളുകള് ശേഖരിക്കും.
പാളികളില് പൊതിഞ്ഞിരുന്ന സ്വര്ണം സ്മാര്ട്ട് ക്രിയേഷന്സ് 2019-ല് പ്രത്യേക സാമഗ്രി ഉപയോഗിച്ച് വേര്തിരിച്ചെന്നും പ്രത്യേക അന്വേഷണ സംഘം കോടതിയെ അറിയിച്ചു.ഇതിന്റെ സാമ്പിള് ലാബ് പരിശോധനയ്ക്ക് അയച്ചിട്ടുണ്ട്.ഈ സാമ്പിളുകളുടെ ലാബ് പരിശോധനാഫലം കവര്ച്ചയുടെ പൂര്ണമായ വിവരം ലഭിക്കാന് നിര്ണായകമാണ്.
ജംഷഡ്പൂരിലെ ലാബില് നടത്തിയ സ്വര്ണപ്പാളികളുടെ ശാസ്ത്രീയ പരിശോധന ഫലത്തിന്റെ വിവരങ്ങള് കോടതിയെ അറിയിച്ചിരുന്നു. പാളികള് മാറ്റിയില്ലെന്നും, പൊതിഞ്ഞിരുന്ന സ്വര്ണം മാത്രമാണ് തട്ടിയെടുത്തതെന്നും പരിശോധന ഫലത്തിന്റെ കണ്ടെത്തല്. ശബരിമല സ്വര്ണക്കൊള്ള കേസിലെ മുഴുവന് പ്രതികളും ജാമ്യത്തിലിറങ്ങിയിട്ടുണ്ട്. ശബരിമല സ്വര്ണക്കൊള്ളയില് പ്രത്യേക അന്വേഷണ സംഘം അന്വേഷണം ആരംഭിച്ചിട്ട് ഏഴ് മാസത്തിലേറെയായി.
