മുള്ളന്പുര്: എതിരാളികള് താരതമ്യേന ദുര്ബലരായ അഫ്ഗാനിസ്ഥാനെങ്കിലും ഭാരത ടീമിലേക്കുള്ള എന്ട്രി സ്പിന് ബൗളര് മാനവ് സുത്താര് ഗംഭീരമാക്കി. ആദ്യം ബാറ്റ് ചെയ്ത് 550ന് മേലുള്ള കൂറ്റന് സ്കോര് പടുത്ത ഭാരതത്തിനെതിരെ ബാറ്റ് ചെയ്യാനിറങ്ങിയ അഫ്ഗാനിസ്ഥാന്റെ മൂന്ന് വിക്കറ്റുകള് വീഴ്ത്തിയാണ് ഈ പുതുമുഖ ബൗളര് കരുത്തറിയിച്ചിരിക്കുന്നത്. എട്ട് വിക്കറ്റില് 564 റണ്സെടുത്ത് ഒന്നാം ഇന്നിങ്സ് ഡിക്ലയര് ചെയ്ത ഭാരതത്തിനെതിരെ ഇന്നലെ വിക്കറ്റെടുക്കുമ്പോള് അഫ്ഗാനിസ്ഥാന് 39.5 ഓവറില് അഞ്ച് വിക്കറ്റ് നഷ്ടത്തില് 113 റണ്സെടുത്ത് നില്ക്കുകയാണ്.
ഇടംകൈയ്യന് സ്പിന്നര് സുത്താര് ആണ് അഫ്ഗാന് നിരയിലെ ആദ്യ വിക്കറ്റ് വീഴ്ത്തിയത്. ഭാരതത്തിനെതിരെ തുടക്കം തന്നെ ഏകദിന ശൈലിയില് ബാറ്റ് വീശി തുടങ്ങിയ അഫ്ഗാനിസ്ഥാനെതിരെ ഭാരത ക്യാപ്റ്റന് ശുഭ്മാന് ഗില് അധികം താമസിയാതെ സ്പിന് ബൗളറെ പന്തേല്പ്പിക്കുകയായിരുന്നു. ക്യാപ്റ്റന്റെ വിശ്വാസം കാത്തുകൊണ്ട് ആറാം ഓവറിലെ നാലാം പന്തില് മാനവ് ഭാരതത്തിനും സ്വന്തം കരിയറിനും ആദ്യ സ്ട്രൈക്ക് നല്കി. 18 പന്തില് 16 റണ്സെടുത്ത അബ്ദുല് മാലിക്കിനെ പുറത്താക്കി. രഹ്മാനുല്ലാ ഗുര്ബാസ്(12), വിക്കറ്റ് കീപ്പര് അഫ്സര് സസായി(മൂന്ന്) എന്നിവരെയും സുത്താര് പുറത്താക്കി. അഫ്ഗാന് ബാറ്റര്മാര്ക്ക് സുത്താര് സമ്മര്ദ്ദം സൃഷ്ടിച്ചതോടെ പേസര് പ്രസിദ്ധ് കൃഷ്ണയും അവസരത്തിനൊത്തുയര്ന്നു. ഓപ്പണര് സെധിഖുല്ലാ അടല്(17), ക്യാപ്റ്റന് ഹഷ്മത്തുല്ലാ ഷാഹിദി(20) എന്നിവരുടെ വിക്കറ്റ് പ്രസിദ്ധ് ആണ് നേടിയത്.
അഫ്ഗാന് നിരയിലെ ടോപ് സ്കോറര് ആയി റഹ്മത്ത് ഷാ(43) പുറത്താകാതെ ക്രീസിലുണ്ട്.
നേരത്തെ തലേന്നത്തെ സ്കോറിനോട് 196 റണ്സ് കൂടി ചേര്ത്ത ശേഷമാണ് ഭാരതം ഇന്നിങ്സ് ഡിക്ലയര് ചെയ്യാന് തീരുമാനിച്ചത്. ആദ്യ ദിനത്തില് സെഞ്ചുറിനേടിക്കൊണ്ട് പുറത്താകാതെ നിന്ന ക്യാപ്റ്റന് ശുഭ്മാന് ഗില്(126) വളരെ വേഗം പുറത്തായി. അര്ദ്ധ സെഞ്ചുറി പ്രകടനത്തിലൂടെ തിരിച്ചുവരവ് നടത്തിയ ഋഷഭ് പന്ത്(81) മികച്ച സംഭാവന നല്കിയാണ് മടങ്ങിയത്. പിന്നീടെത്തിയവരില് വാഷിങ്ടണ് സുന്ദര്(52) അര്ദ്ധ സെഞ്ചുറി നേടി. ധ്രുവ് ജുറെല്(19), മാനവ് സുത്താര്(28), മുഹമ്മദ് സിറാജ്(22) എന്നവര് ഭാരത നിരയില് പുറത്തായ മറ്റ് താരങ്ങള്. കുല്ദീപ് യാദവ്(ഒമ്പത്) പുറത്താകാതെ നിന്നു.
