ഇടുക്കി: സംസ്ഥാനത്ത് കാലവര്‍ഷം കനത്തതോടെ പലയിടത്തും നാശനഷ്ടങ്ങള്‍. അടിമാലിയില്‍ വൈദ്യുതാഘാതമേറ്റ് യുവാവ് മരിച്ചു. ഇരുമ്പുപാലം പടിക്കപ്പ് ഉന്നതിയിലെ രമേശ് (24) ആണ് മരിച്ചത്. വൈദ്യുതി ലൈനില്‍ ചാഞ്ഞുകിടക്കുന്ന മരക്കമ്പുകള്‍ വെട്ടുന്ന ജോലിക്കിടെയാണ് വൈദ്യുതാഘാതം ഏറ്റത്.കൊടുങ്ങല്ലൂരില്‍ മരം വീണ് സ്‌കൂട്ടര്‍ യാത്രികനും, കോഴിക്കോട് ആംബുലന്‍സ് തെന്നി മറിഞ്ഞ് വയോധികയും മരിച്ചു.
കനത്ത മഴയില്‍ കാഞ്ഞങ്ങാട് ഹൊസ്ദുര്‍ഗില്‍ യു ബി എം സി സ്‌കൂള്‍ വളപ്പിനോട് ചേര്‍ന്ന മതില്‍ക്കെട്ട് ഇടിഞ്ഞു താണു. യു ബി എം ചര്‍ച്ചിന് പിന്നിലെ നിര്‍മ്മാണത്തിലുളള മതിലാണ് തകര്‍ന്നത്. സ്‌കൂള്‍ കുട്ടികളുള്‍പ്പെടെ ഉപയോഗിക്കുന്ന വഴിയിലാണ് കോണ്‍ക്രീറ്റ് ഭീമും ഉരുളന്‍ കല്ലുകളും ഉള്‍പ്പെടെ നിലം പതിച്ചത്. ആരും കടന്നുപോകാത്ത സമയമായതിനാല്‍ വലിയ ദുരന്തം ഒഴിവായി.
ആലപ്പുഴ ബൈപ്പാസിനോട് ചേര്‍ന്നുള്ള വീടുകളില്‍ വെള്ളക്കെട്ടുണ്ടായി. വെള്ളക്കെട്ടില്‍ പ്രതിഷേധിച്ച് നാട്ടുകാര്‍ ദേശീയപാത ഉപരോധിച്ചു.
അതേസമയം, സംസ്ഥാനത്ത് അതിശക്തമായ മഴയുടെ പശ്ചാത്തലത്തില്‍ വയനാട്, കാസര്‍ഗോഡ്, കണ്ണൂര്‍,കോഴിക്കോട് ജില്ലകളില്‍ വിദ്യാഭ്യാസ സ്ഥാപനങ്ങള്‍ക്ക് ശനിയാഴ്ച അവധി പ്രഖ്യാപിച്ചു.ഈ ജില്ലകളിലെ പ്രൊഫഷണല്‍ കോളേജുകള്‍ ഉള്‍പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്‍ക്കും ജില്ലാ കളക്ടര്‍മാര്‍ അവധി പ്രഖ്യാപിച്ചു.
വയനാട്ടില്‍ ചുവപ്പ് ജാഗ്രത പ്രഖ്യാപിച്ച സാഹചര്യത്തില്‍ മേപ്പാടി ഗ്രാമപഞ്ചായത്തില്‍ പ്രത്യേക ജാഗ്രത നിര്‍ദേശം പുറപ്പെടുവിച്ചിട്ടുണ്ട്. 5, 6 തീയതികളില്‍ മേപ്പാടി ഗ്രാമപഞ്ചായത്ത് പരിധിയില്‍ വിനോദസഞ്ചാര കേന്ദ്രങ്ങള്‍ തുറക്കാന്‍ പാടില്ല. റിസോര്‍ട്ട് ഹോംസ്റ്റേ, സര്‍വീസ് വില്ലകളും പ്രവര്‍ത്തിപ്പിക്കരുതെന്നാണ് ഗ്രാമ പഞ്ചായത്ത് നിര്‍ദേശം നല്‍കിയത്.
സംസ്ഥാനത്ത് ശനിയും ഞായറും അതിതീവ്ര മഴയ്‌ക്ക് സാധ്യതയുണ്ട്.
