ന്യൂദല്ഹി: ആഗോള സാമ്പത്തിക പ്രതിസന്ധികള്ക്കിടയില് ഊര്ജ സുരക്ഷ അടക്കം വിവിധ മേഖലകളില് സഹകരണത്തിന് ഭാരതം- വെനസ്വേല ധാരണ. ഭാരതം സന്ദര്ശിക്കുന്ന വെനസ്വേലയുടെ ആക്ടിങ് പ്രസിഡന്റ് ഡെല്സി റോഡ്രിഗസും പ്രധാനമന്ത്രി നരേന്ദ്രമോദിയും ദല്ഹിയില് ചര്ച്ച നടത്തി.
ഭാരതത്തിലെ പൊതുമേഖലാ സ്ഥാപനങ്ങള് വെനസ്വേലയിലെ എണ്ണപ്പാടങ്ങളില് നിലവില് വലിയ നിക്ഷേപം നടത്തിയിട്ടുണ്ട്. ഈ സാന്നിധ്യം ഇനിയും വര്ദ്ധിപ്പിക്കാന് ഭാരതം താത്പര്യം പ്രകടിപ്പിച്ചു. ഭാരതവും വെനസ്വേലയും തമ്മിലുള്ള ഉഭയകക്ഷി വ്യാപാരം 2025- 26 സാമ്പത്തിക വര്ഷത്തില് 678.94 ദശലക്ഷം യുഎസ് ഡോളറിലെത്തിയിരിക്കുകയാണ്. ഈ വിപണി സാധ്യത ഇനിയും വിപുലീകരിക്കാന് ഇരുരാജ്യങ്ങളും തീരുമാനിച്ചു.
ഫാര്മസ്യൂട്ടിക്കല്സ് ആന്ഡ് ഹെല്ത്ത് കെയര് മേഖലയിലും സഹകരണം വര്ദ്ധിപ്പിക്കാനും ഭാരതത്തില് നിര്മിച്ച ഗുണനിലവാരമുള്ള മരുന്നുകള് കയറ്റി അയക്കാനും
ധാരണയായി. ചര്ച്ചയില് ഇരുരാജ്യങ്ങളും തമ്മിലുള്ള നയതന്ത്ര- സാമ്പത്തിക ബന്ധങ്ങള് ആഴത്തിലാക്കാനുള്ള തീരുമാനങ്ങള് സ്വീകരിച്ചതായി ഇരു നേതാക്കളും വ്യക്തമാക്കി.
അഞ്ച് ദിവസത്തെ ഔദ്യോഗിക സന്ദര്ശനത്തിനായാണ് ഡെല്സി റോഡ്രിഗസ് ഭാരതത്തില് എത്തിയത്. പ്രസിഡന്റിനോടൊപ്പം വെനസ്വേലയിലെ ധനകാര്യം, വിദേശകാര്യം, ശാസ്ത്ര- സാങ്കേതികവിദ്യ, ഗതാഗതം എന്നീ വകുപ്പുകളിലെ മന്ത്രിമാരടങ്ങുന്ന സംഘവുമുണ്ട്.
പ്രധാനമന്ത്രിയുമായുള്ള കൂടിക്കാഴ്ചയ്ക്ക് മുന്നോടിയായി വിദേശകാര്യമന്ത്രി ഡോ. എസ്. ജയശങ്കറുമായും ഡെല്സി റോഡ്രിഗസ് ചര്ച്ചകള് നടത്തിയിരുന്നു.
