മക്കളുടെ ആഗ്രഹത്തിനല്ല, മരിച്ചയാളുടെ നിശ്ചയത്തിനാണ് പ്രധാന്യമെന്ന് ഹൈക്കോടതി, പഠനത്തിന് നല്‍കിയ മൃതദേഹം വിട്ടുകൊടുത്തില്ല

കൊച്ചി: മരണത്തോടെ സ്വന്തം ശരീരത്തിന്മേലുള്ള വ്യക്തിയുടെ സ്വാതന്ത്ര്യം അവസാനിക്കുന്നില്ലെന്ന് ഹൈക്കോടതി. വൈദ്യശാസ്ത്രപഠനത്തിന് തന്‌റെ മൃതദേഹം വിട്ടുകൊടുക്കണമെന്ന മരിച്ചയാളുടെ മുന്‍കൂര്‍ നിശ്ചയത്തിനു മുന്നില്‍ മതാചാരപ്രകാരം സംസ്‌കരിക്കണമെന്ന കുടുംബാംഗങ്ങളുടെ ആഗ്രഹത്തിന് പ്രസക്തിയില്ലെന്ന് കോടതി പറഞ്ഞു.
സര്‍ക്കാര്‍ മെഡിക്കല്‍ കോളേജിന് ദാനം ചെയ്ത മാതാവിന്‌റെ മൃതദേഹം മതാചാര പ്രകാരം സംസ്‌കരിക്കുന്നതിന് വിട്ടുതരണമെന്ന് ആവശ്യപ്പെട്ട് മക്കള്‍ കോടതിയെ സമീപിച്ച കേസിലാണ് ജസ്റ്റിസ് എ കെ ജയശങ്കരന്‍ നമ്പ്യാര്‍ , ജസ്റ്റിസ് പ്രീത എ കെ എന്നിവരടങ്ങിയ ഡിവിഷന്‍ ബെഞ്ച് ഈ നിരീക്ഷണം നടത്തിയത്. തങ്ങളുടെ അറിവോ സമ്മതമോ ഇല്ലാതെയാണ് മൃതദേഹം ദാനം ചെയ്തതെന്ന് മക്കള്‍ വാദിച്ചു. എന്നാല്‍, മരിച്ച സ്ത്രീ തന്റെ മൃതദേഹം മെഡിക്കല്‍ കോളേജിന് ദാനം ചെയ്യാന്‍ സമ്മതം നല്‍കിയിരുന്നതായി കോടതി ചൂണ്ടിക്കാട്ടി. മരണത്തോടെ സ്വന്തം ശരീരത്തിന്മേലുള്ള ഒരു വ്യക്തിയുടെ സ്വാതന്ത്ര്യം പൂര്‍ണ്ണമായും അവസാനിക്കുന്നില്ല. മരണശേഷം തന്റെ ശരീരം എന്ത് ചെയ്യണമെന്ന് ജീവിതകാലത്ത് ആ വ്യക്തി നിശ്ചയിച്ചിട്ടുണ്ടെങ്കില്‍ നിയമം ആ തിരഞ്ഞെടുപ്പിനെ മാനിക്കുകയും സംരക്ഷിക്കുകയും ചെയ്യുന്നുവെന്ന് കോടതി പറഞ്ഞു.