ന്യൂദൽഹി: തമിഴ്നാട്ടിലെ നിയമസഭാ തെരഞ്ഞെടുപ്പിന് ശേഷമുള്ള നാടകീയമായ രാഷ്ട്രീയ പുനഃസംഘടനയ്ക്ക് ശേഷം ഡി.എം.കെയും കോൺഗ്രസുമായുള്ള വിള്ളൽ വർദ്ധിക്കുന്നു. ഇതിന്റെ സൂചനയായി ജൂൺ 8 ന് ന്യൂദൽഹിയിൽ നടക്കുന്ന ഇൻഡി ബ്ലോക്ക് യോഗം എം.കെ. സ്റ്റാലിന്റെ നേതൃത്വത്തിലുള്ള ഡി.എം.കെ. വിട്ടുനിൽക്കാൻ തീരുമാനിച്ചു.
“തമിഴ്നാട് നിയമസഭാ തെരഞ്ഞെടുപ്പിനുശേഷം ഡിഎംകെയോട് കോൺഗ്രസ് പാർട്ടി നടത്തിയ വഞ്ചനയിൽ ഡിഎംകെ പ്രവർത്തകർ ഇപ്പോഴും വളരെയധികം വേദനിക്കുന്നതിനാൽ, ജൂൺ 8 ന് ന്യൂദൽഹിയിൽ നടക്കുന്ന ഇൻഡി സഖ്യ യോഗത്തിൽ പ്രത്യേകിച്ചും കോൺഗ്രസ് പാർട്ടി പങ്കെടുക്കുന്ന യോഗമായതിനാൽ ഡിഎംകെ പങ്കെടുക്കില്ല. ഡിഎംകെ ഈ യോഗത്തിൽ പങ്കെടുക്കില്ലെങ്കിലും, യോഗത്തിൽ പങ്കെടുക്കുന്ന മറ്റ് പാർട്ടികൾ മുന്നോട്ടുവച്ചേക്കാവുന്ന രാജ്യത്തിന്റെ ക്ഷേമത്തെ ബാധിക്കുന്ന വിഷയങ്ങളിൽ എപ്പോഴും എന്നപോലെ ശബ്ദം ഉയർത്തുന്നത് തുടരും,”- ഡിഎംകെ പ്രസ്താവനയിൽ പറഞ്ഞു.
ദ്രാവിഡ മുന്നേറ്റ കഴകവുമായുള്ള (ഡിഎംകെ) ബന്ധം വിച്ഛേദിച്ച് തമിഴ്നാട് മുഖ്യമന്ത്രി സി ജോസഫ് വിജയ് നയിക്കുന്ന തമിഴക വെട്രി കഴകവുമായി (ടിവികെ) സഖ്യമുണ്ടാക്കാനുള്ള കോൺഗ്രസ് തീരുമാനത്തെത്തുടർന്നതാണ് ഭിന്നത രൂക്ഷമാക്കിയത്. അതേസമയം ടിവികെയെ വിശാലമായ പ്രതിപക്ഷ പാളയത്തിലേക്ക് കൊണ്ടുവരാനുള്ള ശ്രമങ്ങൾ നടക്കുന്നുണ്ടെന്ന് റിപ്പോർട്ടുണ്ട്.
ടിഎംസി മേധാവിയും പശ്ചിമ ബംഗാൾ മുൻ മുഖ്യമന്ത്രിയുമായ മമത ബാനർജി, ശിവസേന (യുബിടി) മേധാവി ഉദ്ധവ് താക്കറെ, സമാജ്വാദി പാർട്ടി പ്രസിഡന്റ് അഖിലേഷ് യാദവ്, കോൺഗ്രസ് നേതാവ് രാഹുൽ ഗാന്ധി, കോൺഗ്രസ് പ്രസിഡന്റ് മല്ലികാർജുൻ ഖാർഗെ എന്നിവർ പങ്കെടുക്കാൻ സാധ്യതയുള്ളവരാണെന്ന് വൃത്തങ്ങൾ അറിയിച്ചു.
