കുവൈറ്റ് സിറ്റി: കുവൈറ്റ് വിമാനത്താവളത്തില് ഇറാന് നടത്തിയ ആക്രമണത്തില് കൊല്ലപ്പെട്ടത് ഇന്ത്യക്കാരന്.ഇന്ത്യന് എംബസിയാണ് ഇക്കാര്യം സ്ഥിരീകരിച്ചത്. മധ്യപ്രദേശ് സ്വദേശി മന്സൂര് അഹമ്മദ് റഹ്മാന്(55) ആണ് കൊല്ലപ്പെട്ടത്.
മന്സൂര് അഹമ്മദ് റഹ്മാന്റെ കുടുംബാംഗങ്ങളുമായി എംബസി നിരന്തരം ബന്ധം പുലര്ത്തുന്നുണ്ടെന്നും കുടുംബത്തിന് ആവശ്യമായ എല്ലാ സഹായങ്ങളും പിന്തുണയും ലഭ്യമാക്കുന്നതിനായി കുവൈറ്റ് അധികൃതരുമായി ഇടപെടല് നടത്തിവരികയാണെന്നും എംബസി അറിയിച്ചു.ആക്രമണത്തില് പരിക്കേറ്റവര്ക്കും ആവശ്യമായ സഹായം ഉറപ്പാക്കുന്നതിനുള്ള നടപടികള് പുരോഗമിക്കുകയാണ്.
രാജ്യത്തിന്റെ പരമാധികാരത്തിനും സുരക്ഷയ്ക്കുമെതിരായ ആക്രമണമാണ് ഉണ്ടായതെന്ന് കുവൈറ്റ് വിദേശകാര്യ മന്ത്രാലയം പറഞ്ഞു. ആക്രമണത്തെ തുടര്ന്ന് രാജ്യത്തെ വിവിധ മേഖലകളില് സുരക്ഷാ നടപടികള് ശക്തമാക്കി.പരിക്കേറ്റവര് അഞ്ച് ആശുപത്രികളിലായി ചികിത്സയിലാണ്.പരിക്കേറ്റ 63 പേരില് മൂന്ന് ഇന്ത്യാക്കാരുണ്ടെന്നാണ് റിപ്പോര്ട്ട്.
ബുധനാഴ്ച രാവിലെ ഹോര്മുസ് കടലിടുക്കിനടുത്തുള്ള ഖഷാം ദ്വീപിലേക്ക് അമേരിക്കന് സെന്ട്രല് കമാന്ഡ് നടത്തിയ ആക്രമണത്തിന് തിരിച്ചടിയെന്ന നിലയിലാണ് ഇറാന് പ്രത്യാക്രമണം നടത്തിയത്. യുഎസ് നടത്തിയ ആക്രമണങ്ങളുടെ ഉത്തരവാദിത്തം കുവൈറ്റിനും ബഹ്റൈനുമാണെന്ന് ഇറാന് ആരോപിച്ചു. യുഎസ് ആക്രമണം വെടിനിര്ത്തല് ധാരണയുടെ ലംഘനമാണെന്നും ഇറാനെതിരായ സൈനിക നടപടികള്ക്ക് കുവൈറ്റിന്റെയും ബഹ്റൈന്റെയും പ്രദേശങ്ങള് ഉപയോഗിച്ചുവെന്നും ഇറാന് കുറ്റപ്പെടുത്തി.
