തിരുവനന്തപുരം: മെഡിക്കല് കോളേജ് ആശുപത്രിയില് മഞ്ഞപ്പിത്തം ബാധിച്ച് ചികിത്സയിലായിരുന്ന കൊല്ലം പേരയം സ്വദേശി കട്ടിലില് നിന്ന് താഴെ വീണ് മരിച്ചു. പടപ്പക്കര ലെനിന് ഭവനത്തില് വില്ഫ്രഡ് (62) ആണ് മരിച്ചത്.
ആശുപത്രി അധികൃതരുടെ ഭാഗത്ത് വീഴ്ച ആരോപിച്ച് വില്ഫ്രഡിന്റെ മകന് ലെനിന് നല്കിയ പരാതി പ്രകാരം മെഡിക്കല് കോളേജ് പൊലീസ് കേസ് രജിസ്റ്റര് ചെയ്തു.കഴിഞ്ഞ മേയ് 25 മുതല് തിരുവനന്തപുരം മെഡിക്കല് കോളേജ് ആശുപത്രിയിലെ അഞ്ചാം വാര്ഡില് 17-ാം നമ്പര് ബെഡില് ചികിത്സയിലായിരുന്നു വില്ഫ്രഡ്. മേയ് 30-ന് വൈകുന്നേരം അഞ്ചരയോടെ
അദ്ദേഹം തറയില് കമിഴ്ന്നു വീണു.
ഡോക്ടര്മാര് പരിശോധിച്ച ശേഷം ഉടന് തന്നെ തീവ്രപരിചരണ വിഭാഗത്തിലേക്ക് മാറ്റി.എന്നാല് ഒരു മണിക്കൂറിനകം മരണം സ്ഥിരീകരിച്ചു. ലെനിന് നേരിട്ട് സ്റ്റേഷനില് ഹാജരായി നല്കിയ മൊഴി കണക്കിലെടുത്താണ് പൊലീസ് നടപടി സ്വീകരിച്ചത്.
എന്നാല് സംഭവത്തില് തങ്ങളുടെ ഭാഗത്ത് വീഴ്ചയില്ലെന്ന് ആശുപത്രി അധികൃതര് പറഞ്ഞു.മഞ്ഞപ്പിത്തം രോഗിയുടെ കരളിനെയും തലച്ചോറിനെയും ബാധിച്ചിരുന്നു.അതിനാല് പെരുമാറ്റ വൈകല്യം ഉണ്ടായ അവസ്ഥയിലായിരുന്നു രോഗിയെന്നാണ് വിശദീകരണം.
