ന്യൂദല്ഹി : ഗുസ്തി താരം വിനേഷ് ഫോഗട്ടിന് ഏഷ്യന് ഗെയിംസ് ട്രയല്സില് പങ്കെടുക്കാന് അനുവാദം നല്കിയ ദല്ഹി ഹൈക്കോടതി ഉത്തരവിനെതിരെ റെസ്ലിംഗ് ഫെഡറേഷന് ഓഫ് ഇന്ത്യ സുപ്രീംകോടതിയില്.കേസ് വെളളിയാഴ്ച പരിഗണിക്കും.
ഈ വര്ഷത്തെ ഏഷ്യന് ഗെയിംസ് സെലക്ഷന് ട്രയല്സില് പങ്കെടുക്കാന് വിനേഷ് ഫോഗട്ടിന് ദല്ഹി ഹൈക്കോടതി ഡിവിഷന് ബെഞ്ച് അനുമതി നല്കിയിരുന്നു.ഈ വിധിക്കെതിരെയാണ് അപ്പീല്.
ജസ്റ്റിസ് പി എസ് നരസിംഹ അധ്യക്ഷനായ ബെഞ്ച് കേസ് പരിഗണിക്കും. ഈ മാസം 30 ,31 തീയതികളില് ആണ് സെലക്ഷന് ട്രയല്സ്. വനിത കായികതാരങ്ങളെ ഒഴിവാക്കുന്നതിനും പാര്ശ്വവല്ക്കരിക്കുന്നതിനും ഉള്ള കാരണമായി മാതൃത്വം മാറുന്നില്ലെന്ന് റെസ്ലിംഗ് ഫെഡറേഷന് ഓഫ് ഇന്ത്യയ്ക്കെതിരെ വിമര്ശനം നടത്തിയായിരുന്നു ദല്ഹി ഹൈക്കോടതി ഡിവിഷന് ബെഞ്ച് വിനേഷ് ഫോഗട്ടിന് അനുമതി നല്കിയത്.
സെലക്ഷന് പ്രക്രിയയില് സുതാര്യത ഉറപ്പാക്കാന് സ്പോര്ട്സ് അതോറിറ്റി ഓഫ് ഇന്ത്യയും ഇന്ത്യന് ഒളിമ്പിക് അസോസിയേഷനും നിയമിച്ച സ്വതന്ത്ര നിരീക്ഷകരുടെ മേല്നോട്ടത്തില് ട്രയല്സിന്റെ ദൃശ്യങ്ങള് പകര്ത്തി സൂക്ഷിക്കണമെന്നും ഹൈക്കോടതി ഉത്തരവിലുണ്ടായിരുന്നു. റെസലിംഗ് ഫെഡറേഷന് ഓഫ് ഇന്ത്യയുടെ സെലക്ഷന് നയത്തെ ചോദ്യം ചെയ്ത് വിനേഷ് ഫോഗട്ട് സമര്പ്പിച്ച ഹര്ജിയില് ആയിരുന്നു ഉത്തരവ് ഉണ്ടായത്.
