ആലപ്പുഴ: സംസ്ഥാനത്ത് എസ്എഫ്ഐ ചൊവ്വാഴ്ച നടത്തിയ പ്രതിഷേധ പ്രകടനങ്ങള്ക്കിടെ അക്രമം നടത്തിയതിന് മൂന്ന് ജില്ലകളില് കേസ്. ആലപ്പുഴയിലെ എസ്പി ഓഫീസിലേക്ക് നടത്തിയ പ്രകടനത്തില് 13പേര്ക്കെതിരെ കേസെടുത്തു. ലഹളയുണ്ടാക്കണമെന്ന് ഉദ്ദേശത്തില് ന്യായവിരുദ്ധമായി സംഘം ചേര്ന്നെന്നാണ് എഫ്ഐആര്. ഗതാഗത തടസം സൃഷ്ടിച്ചതിനും കേസെടുത്തിട്ടുണ്ട്. എസ്എഫ്ഐ ജില്ലാ പ്രസിഡന്റ്, സെക്രട്ടറി എന്നിവരുള്പ്പെടെയാണ് പ്രതികള്.
തിരുവനന്തപുരത്ത് കഴിഞ്ഞ ദിവസം കേരള സര്വകലാശാല യൂണിയന്, സെനറ്റ് തെരഞ്ഞെടുപ്പുകള്ക്ക് പിന്നാലെയുണ്ടായ എസ്എഫ്ഐ-കെഎസ്യു സംഘര്ഷത്തില് പൊലീസ് കേസെടുത്തു. 10 എസ്എഫ്ഐ ഭാരവാഹികള്ക്കെതിരെയാണ് കന്റോണ്മന്റ് പൊലീസ് സ്വമേധായ കേസെടുത്തത്. ആഹ്ലാദ പ്രകടനം അവസാനിപ്പിച്ച് നിന്ന കെഎസ്യു പ്രവര്ത്തകരെ ആക്രമിച്ചു, 30,000 രൂപയുടെ പൊതുമുതല് നശിപ്പിച്ചു തുടങ്ങിയ കുറ്റങ്ങളാണ് എഫ് ഐആറിലുളളത്. കെഎസ്യു പ്രവര്ത്തകര്ക്കെതിരെയും കേസെടുക്കും. സംഘര്ഷത്തില് നിരവധി വിദ്യാര്ത്ഥികള്ക്ക് പരിക്കേറ്റിരുന്നു.
അതേസമയം കണ്ണൂരിലെ എസ് പി ഓഫീസിലേക്ക് എസ്എഫ്ഐ പ്രതിഷേധത്തില് നേതാക്കള് ഉള്പ്പെടെ നൂറോളം പ്രവര്ത്തകര്ക്കെതിരെ കേസെടുത്തിട്ടുണ്ട്. ക്യത്യനിര്വഹണം തടസപ്പെടുത്തല്, പൊതുമുതല് നശിപ്പിക്കല് എന്നീ വകുപ്പുകള് ചുമത്തി. ഒരു ലക്ഷം രൂപയുടെ നാശനഷ്ടം വരുത്തിയെന്ന് എഫ്ഐആറില് പറയുന്നു.സിറ്റി പൊലീസ് കമ്മീഷണറുടെ ഔദ്യോഗിക വാഹനത്തിനും കേട് വരുത്തി.
കേരള സര്വകലാശാല തെരഞ്ഞെടുപ്പ് വിജയത്തിന് പിന്നാലെ എസ്എഫ്ഐ നടത്തിയ ആഹ്ലാദ പ്രകടനത്തിടെ തിരുവനന്തപുരം നഗരത്തില് ഇന്നലെ രാത്രി കെ എസ്യു പ്രവര്ത്തകരുമായി സംഘര്ഷമുണ്ടായിരുന്നു.എന്നാല് പൊലീസ് ഏകപക്ഷീയ നടപടി സ്വീകരിച്ചെന്ന് ആരോപിച്ചാണ് എസ്എഫ്ഐ ഇന്ന് സംസ്ഥാന വ്യാപകമായി പ്രതിഷേധ പ്രകടനം നടത്തിയത്.
