ബെംഗളൂരു ; കോൺഗ്രസ് നേതൃത്വവുമായി കർണാടക മുഖ്യമന്ത്രി സിദ്ധരാമയ്യ ഇടയുന്നതായി സൂചന . കർണാടക മുഖ്യമന്ത്രി സ്ഥാനം ഒഴിയാൻ സിദ്ധരാമയ്യയോട് ആവശ്യപ്പെട്ടതായാണ് സൂചന . അതിനു പകരമായി കോൺഗ്രസ് ഹൈക്കമാൻഡ് അദ്ദേഹത്തെ രാജ്യസഭയിലേക്ക് അയയ്ക്കാമെന്നും, ഡൽഹിയിൽ കൂടുതൽ ഉത്തരവാദിത്തങ്ങൾ നൽകാമെന്നുമൊക്കെ വാഗ്ദാനം ചെയ്യുകയും ചെയ്തിരുന്നു. എന്നാൽ സിദ്ധരാമയ്യ അതൊക്കെ നിരസിച്ചുവെന്നാണ് റിപ്പോർട്ടുകൾ.
മുഖ്യമന്ത്രി സ്ഥാനത്തെച്ചൊല്ലി സിദ്ധരാമയ്യയും ഡി.കെ. ശിവകുമാറും തമ്മിലുള്ള തർക്കത്തിന്റെ പേരിൽ ന്യൂഡൽഹിയിൽ നിരവധി തവണ ചർച്ചകൾ നടന്നിരുന്നു.രാഹുലുമായി കൂടിക്കാഴ്ച നടത്തിയിട്ടും കർണാടക പ്രശ്നം പരിഹരിക്കപ്പെട്ടില്ല. മറ്റെല്ലാ വിഷയങ്ങളും അദ്ദേഹത്തിന്റെ ആശങ്കകളും കണക്കിലെടുക്കുമെന്ന് കോൺഗ്രസ് ഹൈക്കമാൻഡ് യോഗത്തിൽ സിദ്ധരാമയ്യയ്ക്ക് ഉറപ്പ് നൽകിയതായും സൂചനയുണ്ട് . എന്നാൽ ഒരു തരത്തിലും ഒത്തുതീർപ്പിന് വഴങ്ങില്ലെന്നാണ് സിദ്ധരാമയ്യയുടെ വാദം.
കേരളത്തിൽ മുഖ്യമന്ത്രി സ്ഥാനത്തിനു വേണ്ടിയുള്ള വടം വലി തെരുവ് വരെ വന്നിരുന്നു. ഒടുവിലാണ് ലീഗിന്റെ സമ്മർദ്ദത്തിന് വഴങ്ങി വി ഡി സതീശനെ മുഖ്യമന്ത്രിയാക്കിയത് . കർണാടകയിലും മതന്യൂനപക്ഷങ്ങളെ ഒപ്പം നിർത്താനുള്ള സിദ്ധരാമയ്യയുടെ അവസാനശ്രമമായിരുന്നു ഹിജാബ് വിലക്ക് പിൻവലിച്ചത് . മാത്രമല്ല ഹിന്ദു വിശ്വാസങ്ങൾ പിന്തുടരുന്ന ശിവകുമാറിനോട് കർണാടകയിലെ ന്യൂനപക്ഷങ്ങൾക്ക് അതൃപ്തി ഉണ്ട് താനും. അത് മുതലെടുക്കാനാണ് സിദ്ധരാമയയ്യുടെ നീക്കം .
