കണ്ണൂര്: എസ് പി ഓഫീസിലേക്ക് എസ്എഫ്ഐയുടെ പ്രതിഷേധത്തില് ഉണ്ടായ അക്രമത്തില് നേതാക്കള്ക്കും നൂറോളം പ്രവര്ത്തകര്ക്കും എതിരെ കേസ്. ഔദ്യോഗിക കൃത്യനിര്വഹണം തടസപ്പെടുത്തല്, പൊതുമുതല് നശിപ്പിക്കല് എന്നീ വകുപ്പുകളുള്പ്പെടെ ചുമത്തി.
ഒരു ലക്ഷം രൂപയുടെ നാശനഷ്ടം വരുത്തിയെന്നാണ് എഫ് ഐ ആറില് പറയുന്നത്.സിറ്റി പൊലീസ് കമ്മീഷണറുടെ ഔദ്യോഗിക വാഹനത്തിനും കേടുപാട് വരുത്തി.തിരുവനന്തപുരത്ത് കേരള സര്വകലാശാല യൂണിയന് തിരഞ്ഞെടുപ്പ് വിജയാഘോഷത്തിനിടെ കെ എസ് യുവുമായി ഉണ്ടായ സംഘര്ഷത്തിന് പിന്നാലെ ഉണ്ടായ പൊലീസ് നടപടിയില് പ്രതിഷേധിച്ചാണ് സംസ്ഥാന വ്യാപക പ്രതിഷേധം എസ്എഫ്ഐ നടത്തിയത്.
തിരുവനന്തപുരത്തെ സെക്രട്ടേറിയറ്റ് മാര്ച്ചില് ഉള്പ്പെടെ സംഘര്ഷമുണ്ടായി. മലപ്പുറത്തും തൃശൂരും ആലപ്പുഴയിലും പ്രവര്ത്തകരും പൊലീസുമായി ഏറ്റുമുട്ടലുണ്ടായി. തിരുവനന്തപുരത്തെ സംഘര്ഷത്തില് സംസ്ഥാന പ്രസിഡന്റ് എം ശിവപ്രസാദ് ഉള്പ്പെടെ പത്ത് എസ്എഫ്ഐ പ്രവര്ത്തകര്ക്ക് എതിരെ കേസെടുത്തു.
എറണാകുളം കമ്മീഷണര് ഓഫീസിലേക്ക് എസ്എഫ്ഐ നടത്തിയ മാര്ച്ചും സംഘര്ഷത്തില് കലാശിച്ചു. പത്തനംതിട്ട എസ്പി ഓഫീസിലേക്കും പ്രവര്ത്തകര് പ്രതിഷേധവുമായെത്തി. മലപ്പുറത്ത് പ്രതിഷേധക്കാര്ക്ക് നേരെ ലാത്തിച്ചാര്ജ് നടത്തി. എസ്എഫ്ഐ പാലക്കാട് ജില്ല കമ്മിറ്റി എസ്.പി ഓഫീസിലേക്ക് നടത്തിയ മാര്ച്ചില് സംഘര്ഷമുണ്ടായി. തിരുവനന്തപുരം സംഘര്ഷത്തില് സംസ്ഥാന പ്രസിഡന്റ് എം ശിവപ്രസാദ് ഉള്പ്പെടെ പത്ത് എസ്എഫ്ഐ പ്രവര്ത്തകള്ക്ക് എതിരെ കേസെടുത്തു. പ്രതിഷേധങ്ങളെ അടിച്ചമര്ത്തിയാല് നേരിടുമെന്ന് എസ്എഫ്ഐ മുന്നറിയിപ്പ് നല്കി.
