ധാക്ക: ബംഗ്ലാദേശിൽ ട്രക്ക് മറിഞ്ഞ് 15 പേർ മരിച്ചു. അപകടത്തിൽ 10 പേർക്ക് പരിക്കേറ്റതായും റിപ്പോർട്ടുകൾ പറയുന്നു. ധാക്കയിൽ നിന്ന് 83 കിലോമീറ്റർ അകലെയാണ് അപകടമുണ്ടായതെന്ന് പോലീസ് പറഞ്ഞു. ട്രക്കിലുണ്ടായിരുന്നവർ ഭൂരിഭാഗവും ഈദ് ആഘോഷിക്കാൻ വീട്ടിലേക്ക് മടങ്ങുകയായിരുന്ന ദിവസ വേതന തൊഴിലാളികളായിരുന്നു. വഴിയിൽ ട്രക്ക് ഡ്രൈവർക്ക് പെട്ടെന്ന് നിയന്ത്രണം നഷ്ടപ്പെട്ടതാണ് അപകടത്തിലേക്ക് നയിച്ചത്.
തിങ്കളാഴ്ച പുലർച്ചെയാണ് മധ്യ ബംഗ്ലാദേശിലെ ഒരു പ്രധാന ഹൈവേയിൽ ഇരുമ്പ് കമ്പികളും യാത്രക്കാരും കയറിയ ട്രക്ക് മറിഞ്ഞത്. ധാക്കയിൽ നിന്ന് 83 കിലോമീറ്റർ വടക്കുപടിഞ്ഞാറായി ടാംഗൈൽ ജില്ലയിലെ സൊറാട്ടോ പ്രദേശത്ത് പുലർച്ചെ 5 മണിയോടെയാണ് അപകടം ഉണ്ടായത്. ഡ്രൈവർക്ക് വാഹനത്തിന്റെ നിയന്ത്രണം നഷ്ടപ്പെട്ടപ്പോഴാണ് അപകടമുണ്ടായതെന്ന് പ്രാദേശിക പോലീസ് മേധാവി ഫുവാദ് ഹൊസൈൻ പറഞ്ഞു. പരിക്കേറ്റവരെ അടുത്തുള്ള ആശുപത്രിയിൽ പ്രവേശിപ്പിച്ചു, അവിടെ അവർ ഇപ്പോൾ ചികിത്സയിലാണ്.
അതേ സമയം തന്നെ 170 ദശലക്ഷത്തിലധികം ജനങ്ങളുള്ള ഈ രാജ്യത്ത്, മോശം ഗതാഗത നിയന്ത്രണങ്ങൾ, മോശം റോഡ് അവസ്ഥകൾ, വൈദഗ്ധ്യമില്ലാത്ത ഡ്രൈവർമാർ എന്നിവ കാരണം ഓരോ വർഷവും ആയിരക്കണക്കിന് ആളുകളാണ് റോഡപകടങ്ങളിൽ മരിക്കുന്നത്.
