കൊച്ചി: അമ്മയില് എക്സിക്യൂട്ടീവ് കമ്മിറ്റിയിലെ കലഹത്തെ തുടര്ന്ന് താരങ്ങള് പരസ്യ പ്രതികരണം നടത്തിയ സാഹചര്യത്തില് അമ്മ നേതൃത്വം പിരിച്ചു വിടണമെന്ന ആവശ്യവുമായി നടി പൊന്നമ്മ ബാബു. ഇപ്പോഴുള്ളവര് തുടര്ന്നാല് പ്രശ്നങ്ങള് കൂടുതല് വഷളാകും.
പ്രസിഡന്റിനും സെക്രട്ടറിക്കും ഈഗോ പ്രശ്നമാണ്. ഒന്നിച്ചു നില്ക്കേണ്ടവരാണ് കലഹമുണ്ടാക്കുന്നത്.സ്ത്രീകള് നേതൃനിരയില് വന്നപ്പോള് സ്ത്രീകള്ക്ക് വേണ്ടി എന്തെങ്കിലും ചെയ്യുമെന്ന് പ്രതീക്ഷ ഉണ്ടായിരുന്നുവെന്ന് പൊന്നമ്മ ബാബു പറഞ്ഞു.
എക്സിക്യൂട്ടിവ് കമ്മിറ്റിയില് നിന്ന് രാജിവച്ച അന്സിബ ഹസന് കഴിഞ്ഞ ദിവസമാണ് സംഘടന നേതൃത്വത്തിനെതിരെയും ടിനി ടോമിനെതിരെയും തുറന്നടിച്ചത്.ടിനിടോം ജിഹാദിയെന്ന് വിളിച്ചു, മതപരിവര്ത്തനം നടത്തിയെന്ന് ആരോപിച്ചു, അവിഹിത ബന്ധമുണ്ടെന്ന് പറഞ്ഞു പരത്തി, പൊലീസിന് വ്യാജ പരാതി നല്കി തുടങ്ങി ഗുരുതര ആരോപണങ്ങളാണ് അന്സിബ ഉന്നയിച്ചത്. പിന്നാലെ ടിനി ടോമിനെതിരെ നടി നീനാ കുറുപ്പും ആരോപണങ്ങള് ഉന്നയിച്ചു.കുടുംബമേളക്കിടെ ടിനി കയ്യേറ്റം ചെയ്യാന് ശ്രമിച്ചെന്നും അസഭ്യം പറഞ്ഞെന്നും സംഘടനക്ക് പരാതി നല്കി. അന്സിബയുടെ പരാതി കേള്ക്കാന് തയാറായ എക്സിക്യൂട്ടിവ് അമ്മ ഓഫീസിലേക്ക് വിളിപ്പിച്ചെങ്കിലും അന്സിബ മറുപടി നല്കിയില്ലെന്നാണ് വിവരം.
അതേസമയം, അന്സിബക്കെതിരെ പരാതി നല്കിയ നടി താനാണെന്ന് വെളിപ്പെടുത്തി ലക്ഷ്മിപ്രിയ രംഗത്തെത്തി. അന്സിബയുടെ ആരോപണങ്ങള് നിഷേധിച്ചുകൊണ്ടായിരുന്നു ലക്ഷ്മിപ്രിയയുടെ വാര്ത്താസമ്മേളനം. അന്സിബയ്ക്ക് പിന്നില് നീനാ കുറുപ്പാണ്. സെക്രട്ടറിയും പരിവാരങ്ങളും ചേര്ന്ന് അമ്മ ഓഫീസിനെ അധോലോക കേന്ദ്രമാക്കിയെന്ന് ലക്ഷ്മി പ്രിയ കുറ്റപ്പെടുത്തി.ടിനി ടോമിനെ ലക്ഷ്മിപ്രിയ ന്യായീകരിച്ചു. ഇതിനിടയിലാണ് അമ്മ നേതൃത്വത്തിനെതിരെ നടി മാലാപാര്വതി രംഗത്തുവന്നത്. സംഘടനയില് നടക്കുന്നതൊന്നും അംഗങ്ങള് അറിയുന്നില്ല. ഇങ്ങനെ തമ്മില് തല്ലുന്ന നേതൃത്വം മാറണമെന്നും മാലാ പാര്വതി പറഞ്ഞു. അടുത്ത മാസത്തെ ജനറല് ബോഡിയില് പ്രശ്നങ്ങള് ചര്ച്ച ചെയ്യുമെന്ന് അമ്മ പ്രസിഡന്റ് ശ്വേത മേനോന് പറഞ്ഞു.
