തിരുവനന്തപുരം: മുഖ്യമന്ത്രിസ്ഥാനത്തേക്കുള്ള പത്തുദിവസത്തെ വടംവലിക്ക് പിന്നാലെ കോണ്‍ഗ്രസില്‍ സംസ്ഥാന അധ്യക്ഷപദത്തിന് വേണ്ടിയും കസേരകളി. അവകാശവാദവുമായി നിരവധിപേര്‍ രംഗത്ത്.
ഗ്രൂപ്പുതിരിഞ്ഞും മതവര്‍ഗീയ ശക്തികളെ കൂട്ടുപിടിച്ചുമുള്ള മുഖ്യമന്ത്രിപ്പോരിലെ മുറിവുണങ്ങുന്നതിന് മുമ്പേ കെപിസിസി അധ്യക്ഷപദത്തിനുള്ള കസേരകളി ശക്തമായത് ഹൈക്കമാന്‍ഡിനും തലവേദനയായി. സണ്ണി ജോസഫ് മന്ത്രിയായതോടെയാണ് മന്ത്രിസഭയില്‍ ഇടം നേടാനാകാതെ മനോവേദന അനുഭവിക്കുന്നവരും ഗ്രൂപ്പുനേതാക്കളും പ്രസിഡന്റാകാന്‍ രംഗത്തെത്തിയത്. മന്ത്രിസ്ഥാനം കിട്ടാത്തതില്‍ പരിഭവമുള്ള ജോസഫ് വാഴയ്‌ക്കന്‍, പിന്നാക്ക വിഭാഗക്കാര്‍ക്ക് പ്രസിഡന്റ് സ്ഥാനം വേണമെന്ന് ആവശ്യപ്പെട്ട് കൊടിക്കുന്നില്‍ സുരേഷ് എന്നിവര്‍ക്ക് പുറമേ ബെന്നി ബെഹനാന്‍, ആന്റോ ആന്റണി, കെ.സി. ജോസഫ്, എന്നിവരും കരുനീക്കങ്ങള്‍ ആരംഭിച്ചു. താനുമായി ഒത്തു പോകുന്ന ആള്‍ വേണമെന്ന് മുഖ്യമന്ത്രി വി.ഡി.സതീശന്‍ ഹൈക്കമാന്‍ഡിനോട് ആവശ്യപ്പെട്ടു.
യൂത്ത് കോണ്‍ഗ്രസ് സംസ്ഥാന പ്രസിഡന്റ് ഒ.ജെ. ജനീഷ് മന്ത്രിയായതോടെ ഈ സ്ഥാനത്തേക്കും പുതിയ ആളെക്കണ്ടെത്തേണ്ടതായുണ്ട്. യൂത്ത്‌കോണ്‍ഗ്രസ് അധ്യക്ഷന്‍ തന്റെ ആളായിരിക്കണമെന്ന കാര്യത്തില്‍ ഷാഫിപറമ്പില്‍ നിര്‍ബന്ധം പിടിക്കുന്നുണ്ട്.
