തിരുവനന്തപുരം: കോക്രോച്ച് പാര്ട്ടി സോഷ്യല് മീഡിയയിലൂടെ വ്യാജ വാര്ത്തകള് പ്രചരിപ്പിച്ച് രാജ്യത്തെ അസ്ഥിരപ്പെടുത്താനുള്ള ശ്രമത്തിന് പിന്നില് പ്രതിപക്ഷ പാര്ട്ടികളിലെ ചിലരുടെ സഹായമുണ്ടെന്ന് ബിജെപി സംസ്ഥാന പ്രസിഡന്റ് രാജീവ് ചന്ദ്രശേഖര് പറഞ്ഞു.
സോഷ്യല് മീഡിയയും ബോട്ടുകളും എഐയുമൊക്കെ വ്യാപകമായി ദുരുപയോഗം ചെയ്യപ്പെടുന്ന ഇക്കാലത്ത്, വ്യാജ വാര്ത്തകളും ആഖ്യാനങ്ങളും ചമച്ച് ജനങ്ങളെ തെറ്റിദ്ധരിപ്പിക്കുന്നത് വലിയൊരു സുരക്ഷാ ഭീഷണിയാണ്. പുറമേയ്ക്ക് വളരെ സ്വാഭാവികമെന്ന് തോന്നിയേക്കാമെങ്കിലും, രാജ്യത്തിന്റെ സമാധാനവും സ്ഥിരതയും തകര്ക്കാന് ലക്ഷ്യമിട്ടുള്ള ആസൂത്രിത നീക്കങ്ങളാണ് ഇവയെല്ലാം.
പ്രധാനമന്ത്രി നരേന്ദ്ര മോദിയുടെ നേതൃത്വത്തില് രാജ്യം കൈവരിക്കുന്ന വളര്ച്ചയും നേട്ടങ്ങളും പല വിദേശ രാജ്യങ്ങള്ക്കും അസ്വസ്ഥത ഉണ്ടാക്കുന്നുണ്ട്. അതുകൊണ്ടുതന്നെ, നമ്മുടെ മുന്നോട്ടുള്ള കുതിപ്പിന് തടയിടാന് അവര് ഇനിയും പലവിധ തടസങ്ങള് സൃഷ്ടിച്ചുകൊണ്ടേയിരിക്കും.
കൊവിഡ് മഹാമാരി മുതല് റഷ്യ, ഉക്രൈന് യുദ്ധവും, യുഎസ് ഇറാന് സംഘര്ഷവും, ആഗോള ഊര്ജ പ്രതിസന്ധികളും, ചൈനീസ് കടന്നുകയറ്റവും വരെ ലോകത്തിലെ വന്ശക്തികളെപ്പോലും ഉലച്ചുകളഞ്ഞ വലിയ പ്രതിസന്ധികളിലൂടെയാണ് കഴിഞ്ഞ കുറച്ചുകാലമായി ലോകം കടന്നുപോയത്. എന്നാല്, ഈ കൊടുങ്കാറ്റുകള്ക്കിടയിലും ഭാരതീയരുടെ സുരക്ഷ ഉറപ്പാക്കാനും, നമ്മുടെ സമ്പദ്വ്യവസ്ഥയെ വളര്ച്ചയുടെ പാതയില് മുന്നോട്ട് നയിക്കാനും പ്രധാനമന്ത്രിക്ക് സാധിച്ചു.
യഥാര്ത്ഥ നേതൃത്വത്തിന്റെ കരുത്താണിത്. രാജ്യവും ലോകവും ഇത്തരം വലിയ വെല്ലുവിളികള് നേരിടുമ്പോള് നമ്മള് ഒറ്റക്കെട്ടായി നില്ക്കുക എന്നതാണ് ഏറ്റവും പ്രധാനപ്പെട്ട കാര്യം. ചില വിദേശ ശക്തികള്ക്കോ, ഇവിടുത്തെ തരംതാണ പ്രതിപക്ഷ രാഷ്ട്രീയക്കാര്ക്കോ, പ്രധാനമന്ത്രിക്കെതിരെ കോമാളിവേഷം കെട്ടുന്നവര്ക്കോ നമ്മുടെ ഒത്തൊരുമയോ ദൃഢനിശ്ചയത്തെയോ തകര്ക്കാനാകില്ലെന്നും രാജീവ് ചന്ദ്രശേഖര് ഫേസ്ബുക്കില് കുറിച്ചു.
