ചെന്നൈ: സ്വാമി ഈശ രൂപം നല്കിയ ‘ഐ- തിയറി’ സിദ്ധാന്തവും ഗ്ലോബല് എനര്ജി പാര്ലമെന്റിന്റെ പ്രവര്ത്തനങ്ങളും സംബന്ധിച്ച പഠന- ഗവേഷണങ്ങള്ക്ക് ഐഐടി മദ്രാസ് മുന്കൈയെടുക്കുന്നു. ഡയറക്ടര് പ്രൊഫ. വി. കാമകോടി ഇത് സംബന്ധിച്ച റിപ്പോര്ട്ട് കേന്ദ്ര വിദ്യാഭ്യാസ മന്ത്രാലയത്തിന് സമര്പ്പിച്ചു.
ക്വാണ്ടം ഫിസിക്സ്, ബോധമണ്ഡല പഠനം, ലൈഫ് സയന്സ്, ഭാരതീയ ജ്ഞാനപദ്ധതികള് എന്നിവ തമ്മിലുള്ള ബന്ധമാണ് ഐ- തിയറി പരിശോധിക്കുന്നത്. ബോധമണ്ഡല പഠനം, ക്വാണ്ടം സയന്സ്, ശബ്ദ ഊര്ജ സംവിധാനങ്ങള്, പ്രാണാധിഷ്ഠിത ശാസ്ത്രം എന്നിവയില് കൂടുതല് ഗവേഷണ സാധ്യതകള് ഉണ്ടെന്ന് ഐഐടി മദ്രാസ് റിപ്പോര്ട്ടില് വിലയിരുത്തി.
പരമ്പരാഗത ഭാരതീയ ജ്ഞാന പദ്ധതികളിലെ ആശയങ്ങള് ഉപയോഗിച്ച് ക്വാണ്ടം ഫിസിക്സില് കൂടുതല് ഗവേഷണം നടത്താന് വലിയ സാധ്യതയുണ്ടെന്ന് റിപ്പോര്ട്ടില് പറയുന്നു. ഊര്ജശാസ്ത്രജ്ഞര്, നാഡീശാസ്ത്രജ്ഞര്, പരമ്പരാഗത പണ്ഡിതന്മാര് എന്നിവരെ ഉള്പ്പെടുത്തി സെമിനാറുകളും ചര്ച്ചകളും നടത്താന് അദ്ദേഹം ശിപാര്ശ ചെയ്തു. കുറഞ്ഞ ഫ്രീക്വന്സിയിലുള്ള ശബ്ദ ഊര്ജം സംഭരിക്കല്, പ്രാണായാമ ശാസ്ത്രം, എ വണ് കണികകളെക്കുറിച്ചുള്ള പഠനം എന്നിവയില് ശാസ്ത്രീയമായ തെളിവുകളും കൂടുതല് ഗവേഷണങ്ങളും ആവശ്യമാണെന്നും റിപ്പോര്ട്ട് ചൂണ്ടിക്കാണിക്കുന്നു.
ഈ റിപ്പോര്ട്ടിന്റെ പശ്ചാത്തലത്തില്, നിര്ദിഷ്ട വിഷയങ്ങളില് തുറന്ന ശാസ്ത്രീയ ചര്ച്ചകളിലൂടെയും മികച്ച ഗവേഷണ രീതികളിലൂടെയും ശാസ്ത്രീയ പഠനത്തിന് തുടക്കമിടാന് തിരുവനന്തപുരം ആസ്ഥാനമായ ഈശ വിശ്വ പ്രജ്ഞാന ട്രസ്റ്റ് ശ്രമിക്കുന്നതായി ജിഇപി റിസര്ച്ച് സെന്റര് ഡയറക്ടര് ഡോ. ക്രിസ്റ്റോഫ് ഡുമാസ് പറഞ്ഞു. പ്രൊഫ. കാമകോടിയുമായും ഐഐടിയിലെ മറ്റ് അധ്യാപകരുമായും അദ്ദേഹം ഇതുസംബന്ധിച്ച് ചര്ച്ച നടത്തി.
വിവിധ മേഖലകളിലെ ശാസ്ത്രജ്ഞരെയും പണ്ഡിതന്മാരെയും ഇതിലേക്ക് ഒരുമിച്ച് കൊണ്ടുവരുന്നതിനായി സെമിനാറുകളും ഗവേഷണപദ്ധതികളും തയാറാക്കാന് ട്രസ്റ്റ് നടപടികള് ആരംഭിച്ചു. ഭാവിയില് ഇത് വലിയ അക്കാദമിക് സഹകരണങ്ങളിലേക്ക് വഴിമാറുമെന്നാണ് പ്രതീക്ഷയെന്നും അദ്ദേഹം കൂട്ടിച്ചേര്ത്തു.
