കാസര്കോട്: കേരള കേന്ദ്ര സര്വകലാശാലയില് ഈ അധ്യയന വര്ഷം മുതല് പുതിയ ബിരുദാനന്തര ബിരുദ പ്രോഗ്രാം ആരംഭിക്കും. 30 സീറ്റുകളോടെ എംഎസ്സി മൈക്രോബയോളജിയാണ് പുതുതായി തുടങ്ങുന്നത്. 50 ശതമാനം മാര്ക്കോടെ (എസ്സി, എസ്ടി 45 ശതമാനം) ലൈഫ് സയന്സ് വിഷയങ്ങളിലോ അനുബന്ധ വിഷയങ്ങളിലോ ഉള്ള ബിരുദമാണ് യോഗ്യത. നാഷണല് ടെസ്റ്റിംഗ് ഏജന്സി (എന്ടിഎ)യുടെ പൊതുപ്രവേശന പരീക്ഷ (സിയുഇടിപിജി) യിലൂടെയാണ് പ്രവേശനം. സിയുഇടിപിജി എഴുതിയവര് കേരള കേന്ദ്ര സര്വകലാശാല വെബ്സൈറ്റ് സന്ദര്ശിച്ച് ജൂണ് 10 നുള്ളില് രജിസ്റ്റര് ചെയ്യേണ്ടതാണ്.
ശാസ്ത്ര മുന്നേറ്റവും ആരോഗ്യ സംരക്ഷണവും സ്വാധീനം ചെലുത്തുന്ന പുതിയ കാലത്തെ സാധ്യതകള് പ്രയോജനപ്പെടുത്തുകയെന്ന ലക്ഷ്യത്തോടെയാണ് പുതിയ പ്രോഗ്രാം ആരംഭിക്കുന്നത്. സ്വകാര്യ, പൊതുമേഖലകളില് മൈക്രോബയോളജിസ്റ്റുകളുടെ ആവശ്യം വര്ദ്ധിച്ചുവരികയാണ്.
ഫാര്മസ്യൂട്ടിക്കല്സ്, ഭക്ഷ്യസുരക്ഷ, പരിസ്ഥിതി സംരക്ഷണം, ബയോടെക്നോളജി തുടങ്ങിയ മേഖലകളില് കരിയര് അവസരങ്ങളുണ്ട്. എന്വയോണ്മെന്റല് മൈക്രോബയോളജിസ്റ്റ്, ക്ലിനിക്കല് മൈക്രോബയോളജിസ്റ്റ്, ക്വാളിറ്റി കണ്ട്രോള് അനലിസ്റ്റ്, റിസര്ച്ച് സയന്റിസ്റ്റ് എന്നിങ്ങനെ സാധ്യതകള് നീളുന്നു. ഉന്നത പഠനത്തിനും ഗവേഷണത്തിനും അവസരമൊരുക്കുന്നു.
