മുംബൈ: ഭാരത ആഭ്യന്തര ക്രിക്കറ്റിന്റെ 2026-27 സീസണിലേക്കുള്ള വിപുലമായ കലണ്ടര്‍ ബിസിസിഐ പുറത്തിറക്കി.
പുരുഷ-വനിതാ വിഭാഗങ്ങളിലായി വിവിധ പ്രായപരിധിയിലും ഫോര്‍മാറ്റുകളിലുമായി ആകെ 1,788 മത്സരങ്ങളാണ് സീസണില്‍ അരങ്ങേറുന്നത്.ആഗസ്റ്റ് 23-ന് ആരംഭിക്കുന്ന ദുലീപ് ട്രോഫിയോടെയാണ് പുതിയ ആഭ്യന്തര സീസണിന് തുടക്കമാകുന്നത്. ആറ് സോണല്‍ ടീമുകള്‍ പങ്കെടുക്കുന്ന റെഡ്-ബോള്‍ മത്സരമായാണ് ദുലീപ് ട്രോഫി നടക്കുക. ഇതിന് പിന്നാലെ ഒക്ടോബര്‍ ഒന്ന് മുതല്‍ ഇറാനി കപ്പും ആരംഭിക്കും.
ഒക്ടോബര്‍ 11-ന് ജാര്‍ഖണ്ഡിനെതിരെയുള്ള രഞ്ജി ട്രോഫി പോരാട്ടത്തോടെയാണ് കേരള സീനിയര്‍ ടീമിന്റെ സീസണ്‍ ആരംഭിക്കുന്നത്. ഒക്ടോബറില്‍ ഒഡീഷ, ബംഗാള്‍ ടീമുകള്‍ക്കെതിരെയും, ജനുവരി, ഫെബ്രുവരി മാസങ്ങളില്‍ ദല്‍ഹി, സര്‍വീസസ് ടീമുകള്‍ക്കെതിരെയും നടക്കുന്ന നിര്‍ണായക മത്സരങ്ങള്‍ക്ക് കേരളം തന്നെയാണ് ആതിഥേയത്വം വഹിക്കുന്നത്. സീനിയര്‍ ടീമിന്റെ രഞ്ജി ട്രോഫി, സയ്യിദ് മുഷ്താഖ് അലി ട്രോഫി, വിജയ് ഹസാരെ ട്രോഫി പോരാട്ടങ്ങള്‍ക്ക് പുറമെ ദേശീയതല ടൂര്‍ണമെന്റുകള്‍ക്കും ഇത്തവണ സംസ്ഥാനം വേദിയാകും. കേണല്‍ സി.കെ. നായുഡു ട്രോഫി, കൂച്ച് ബെഹാര്‍ ട്രോഫി, അണ്ടര്‍-23 പുരുഷ ടി20, കൂടാതെ പെണ്‍കുട്ടികളുടെ അണ്ടര്‍-15, അണ്ടര്‍-19, അണ്ടര്‍-23 വിഭാഗങ്ങളിലെ എലൈറ്റ് ഗ്രൂപ്പ് മത്സരങ്ങള്‍ ഉള്‍പ്പെടെയുള്ള പ്രമുഖ ടൂര്‍ണമെന്റുകളാണ് ഈ സീസണില്‍ കേരളത്തിലേക്ക് എത്തുന്നത്.
