കോഴിക്കോട്:ചെറുവണ്ണൂരില് കാര് കത്തി ഗര്ഭിണി മരിച്ച സംഭവം ആത്മഹത്യയാകാമെന്ന നിഗമനത്തില് പൊലീസ്. കാറിന് തീപ്പിടിച്ചതില് സോനയുടെ ഭര്ത്താവ് രജിന്ലാലിന് പങ്കില്ലെന്നാണ് പ്രാഥമിക അന്വേഷണത്തില് പൊലീസ് നിഗമനം.
രജിനുമായുള്ള വാക്കുതര്ക്കം മൂലം സോന ആത്മഹത്യ ചെയ്തിരിക്കാമെന്നാണ് പൊലീസ് കരുതുന്നത്. മരണത്തിന് തൊട്ട് മുമ്പ് താന് അനുഭവിച്ച പീഡനങ്ങള് സഹോദരിയോട് സോന പറഞ്ഞിരുന്നു. അന്ന് വൈകിട്ട് സഹോദരിക്കൊപ്പം പേരാമ്പ്രയില് എത്തിയ സോന കന്നാസില് പെട്രോള് വാങ്ങി എന്നാണ് പൊലീസ് പറയുന്നത്.
വെള്ളിയാഴ്ച രാത്രി ഒന്പത് മണിയോടെ രജിന്ലാലിനൊപ്പം ബന്ധുവീട്ടില്നിന്ന് വീട്ടിലേക്ക് പോകും വഴി കൈവശം കരുതിയിരുന്ന പെട്രോളില് സോന തീയിട്ടതാകാമെന്ന നിഗമനമാണ് പൊലീസിനുളളത്. കാര് കത്തിയത് ഷോര്ട് സര്ട്ട്ക്യൂട്ട് മൂലമല്ലെന്ന കണ്ടെത്തലിന് പിന്നാലെ പൊലീസ് നടത്തിയ അന്വേഷണത്തിലാണ് പെട്രോള് വാങ്ങിയത് അറിയുന്നത്. 60 ശതമാനം പൊള്ളലേറ്റ് ചികിത്സയില് കഴിയുന്ന രജിന്ലാലിന്റെ മൊഴിയിലും കാറിനുള്ളില് പെട്രോളിന്റെ ഗന്ധം ഉണ്ടായിരുന്നെന്ന് പറയുന്നുണ്ട്.
പെട്രോളുമായി സോന പോകുന്ന സിസിടിവി ദൃശ്യങ്ങള് പൊലീസിന് ലഭിച്ചിരുന്നു.സിസിടിവി ദൃശ്യങ്ങള് കേന്ദ്രീകരിച്ച് അന്വേഷണം പുരോഗമിക്കുകയാണ്. സോനയുടെ മരണത്തില് രജിന് ലാലിന്റെ കുടുംബത്തിനെതിരെ ആരോപണവുമായി യുവതിയുടെ കുടുംബം രംഗത്തെത്തിയിരുന്നു. സോനയെ ആസൂത്രിതമായി കൊലപ്പെടുത്തിയെന്നാണ് ആരോപണം.
