കൊച്ചി : മോഡലിംഗിനെന്ന വ്യാജേന യുവതികളെ വിദേശത്ത് എത്തിച്ച് ലൈംഗിക ചൂഷണം നടത്തിയ കേസിലെ പ്രധാന പ്രതി സിന്ധുവിനെ കൊച്ചിയില് എത്തിച്ചു. വ്യാഴാഴ്ച കോടതിയില് ഹാജരാക്കും. കേസില് സിനിമാ- സീരിയല് താരങ്ങള്ക്ക് പങ്കുണ്ടോ എന്നത് പരിശോധിക്കുമെന്ന് പൊലീസ് പറഞ്ഞു.
പ്രതി സിന്ധുവിനെ മുംബയില് നിന്നാണ് എറണാകുളത്ത് എത്തിച്ചത്. കസ്റ്റഡിയില് വാങ്ങി ചോദ്യം ചെയ്താല് കേസിലെ കൂടുതല് വിവരങ്ങള് പുറത്തുവരും എന്നാണ് അന്വേഷണസംഘത്തിന്റെ വിലയിരുത്തല്. ഗുണ്ടാ ബന്ധം, സാമ്പത്തിക ഇടപാടുകള് എന്നിവയിലാണ് പ്രധാന അന്വേഷണം.
വിസിറ്റിംഗ് വിസയില് ദുബായില് എത്തിക്കുന്ന യുവതികളെ മയക്കു മരുന്നു നല്കി പലര്ക്കും കാഴ്ചവയ്ക്കും. ഇവരുടെ നഗ്ന ദൃശ്യങ്ങളും പകര്ത്തി ഭീഷണിപ്പെടുത്തും. പ്രധാന ആസൂത്രണം നടത്തിയിരുന്നത് സിന്ധുവാണ്. പിടിയിലായ അലീന സിന്ധുവിന്റെ ഏജന്റെന്നാണ് കരുതുന്നത്.
