ഒസ്ലോ: പ്രധാനമന്ത്രി നരേന്ദ്ര മോദിയുടെ നോര്വേ സന്ദര്ശന വേളയില് ഭാരതവും നോര്വേയും ഉഭയകക്ഷി ബന്ധം കൂടുതല് ശക്തിപ്പെടുത്താന് ധാരണയായി. ഇതോടനുബന്ധിച്ച് ശാസ്ത്രം, സാങ്കേതികവിദ്യ, നൂതനാശയം, സുസ്ഥിര വികസനം എന്നിവയിലെ സഹകരണം വിപുലീകരിക്കാന്, കേന്ദ്ര ശാസ്ത്ര-വ്യാവസായിക ഗവേഷണ വകുപ്പിന് (ഡിഎസ്ഐആര്) കീഴിലുള്ള ശാസ്ത്ര- വ്യാവസായിക ഗവേഷണ കൗണ്സിലും (സിഎസ്ഐആര്), നോര്വേയിലെ പ്രമുഖ ഗവേഷണ, അക്കാദമിക്, വ്യാവസായിക സ്ഥാപനങ്ങളും തമ്മില് നിരവധി സുപ്രധാന കരാറുകളില് ഒപ്പുവച്ചു. സിഎസ്ഐആര് ഡയറക്ടര് ജനറലും ഡിഎസ്ഐആര് സെക്രട്ടറിയുമായ ഡോ. എന്. കലൈശെല്വിയുടെ നേതൃത്വത്തിലാണ് ഭാരത പ്രതിനിധിസംഘം നോര്വേ തലസ്ഥാനമായ ഓസ്ലോയില് വെച്ച് കരാറുകളില് ഒപ്പുവെച്ചത്.
ഇരുരാജ്യങ്ങളിലെയും സ്ഥാപന പങ്കാളിത്തങ്ങള്, അക്കാദമിക് സഹകരണം, സുസ്ഥിര വളര്ച്ചാ സംരംഭങ്ങള് എന്നിവ പ്രോത്സാഹിപ്പിക്കുന്നതിനോടൊപ്പം ഗവേഷണം, നവീകരണം, സാങ്കേതിക വികസനം എന്നിവയില് ഭാരത-നോര്വേ ബന്ധങ്ങള് വികസിപ്പിക്കുക എന്നതും കരാറുകളുടെ പ്രധാന ലക്ഷ്യങ്ങളാണ്. കാലാവസ്ഥാ വ്യതിയാനത്തിനെതിരെയുള്ള പ്രവര്ത്തനങ്ങള്, ഹരിത ഊര്ജ്ജം, സമുദ്ര പഠനം, ആരോഗ്യ സംരക്ഷണം എന്നീ മേഖലകള്ക്ക് മുന്ഗണന നല്കുന്ന ധാരണാപത്രത്തില് ഇരുരാജ്യങ്ങളും ഒപ്പുവെച്ചു.
നോര്വേയിലെ പ്രമുഖ സ്വതന്ത്ര ഗവേഷണ സ്ഥാപനമായ സിന്റഫുമായി 2026-2029 കാലയളവിലേക്കുള്ള പ്രത്യേക കരാറിലും സിഎസ്ഐആര് ഒപ്പുവെച്ചു. ഇരുസ്ഥാപനങ്ങളും തമ്മില് 2014-ല് നിലവില് വന്ന ധാരണാപത്രത്തിന്റെ തുടര്ച്ചയായാണ് ഈ പുതിയ നടപടി. സമുദ്രോര്ജ്ജം, ഓഫ്ഷോര് പവനോര്ജ്ജം എന്നിവയില് സിഎസ്ഐആര് സ്ഥാപനങ്ങളും സിന്റഫ് സ്ഥാപനങ്ങളും തമ്മില് സഹകരണ കരാറിലും ഒപ്പുവച്ചു. ശാസ്ത്ര-സാങ്കേതിക രംഗത്തെ ഹരിത മുന്നേറ്റം ലക്ഷ്യമിട്ട് ശാസ്ത്രം, സാങ്കേതികവിദ്യ, നൂതനാശയ സഹകരണം ഹരിത മാറ്റത്തിന് എന്ന പേരില് ഒരു സംയുക്ത പ്രഖ്യാപനത്തിലും ഇരുരാജ്യങ്ങളും ഒപ്പുവെച്ചു.
ഭാരതത്തിലെ വന്കിട അടിസ്ഥാന സൗകര്യ വികസന പദ്ധതികള്ക്ക് അത്യാധുനിക ഭൂശാസ്ത്രപരമായ പരിഹാരങ്ങള് കണ്ടെത്തുന്നതിനായി സിഎസ്ഐആര് നാഷണല് ജിയോഫിസിക്കല് റിസര്ച്ച് ഇന്സ്റ്റിറ്റ്യൂട്ടും പ്രമുഖ നോര്വീജിയന് കമ്പനിയായ എമറാള്ഡ് ജിയോമോഡലിംഗും തമ്മില് അഞ്ച് വര്ഷത്തെ ധാരണാപത്രത്തില് ഒപ്പുവെച്ചു. നോര്വേയിലെ പ്രമുഖ പങ്കാളിത്ത സ്ഥാപനങ്ങളിലെ ഉന്നത ഉദ്യോഗസ്ഥരും ചടങ്ങില് സന്നിഹിതരായിരുന്നു.
