ടെഹ്‌റാന്‍/വാഷിങ്ടണ്‍: യുദ്ധം അവസാനിപ്പിക്കുന്നതിനായി യുഎസ് ഇറാന് പുതിയ നിര്‍ദേശങ്ങള്‍ കൈമാറി. ഇറാന്റെ യുറേനിയം ശേഖരം യുഎസിലേക്ക് മാറ്റുന്നതടക്കമുള്ള പുതിയ നിര്‍ദേശങ്ങളാണ് യുഎസ് മുന്നോട്ട് വെച്ചിരിക്കുന്നത്. ഈ നിര്‍ദേശങ്ങളില്‍ എത്രയും പെട്ടന്ന് തീരുമാനം കൈക്കൊണ്ടില്ലെങ്കില്‍ പിന്നീട് ഒന്നും അവശേഷിക്കില്ലെന്ന് യുഎസ് പ്രസിഡന്റ് ഡൊണാള്‍ഡ് ട്രംപ് അറിയിച്ചു.
ഇറാനെതിരെയുള്ള യുദ്ധം പുനരാരംഭിക്കുന്നത് സംബന്ധിച്ച് ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹുവുമായി ചര്‍ച്ച നടത്തിയതിന് പിന്നാലെയാണ് ട്രംപ് ഭീഷണിപ്പെടുത്തിയത്.
ഇറാന്റെ കൈവശമുള്ള സമ്പുഷ്ട യുറേനിയം യുഎസിന് കൈമാറണം, ഒരു ആണവകേന്ദ്രം ഒഴിച്ച് ബാക്കിയുള്ളവയുടെ പ്രവര്‍ത്തനം നിര്‍ത്തലാക്കണം, യുദ്ധം മൂലമുണ്ടായ നഷ്ടങ്ങള്‍ക്ക് നഷ്ടപരിഹാരം നല്‍കില്ല, ഇറാന്റെ മരവിപ്പിച്ച വിദേശ ആസ്തികളില്‍ 25 ശതമാനം വിട്ടുനല്‍കില്ല തുടങ്ങിയ നിര്‍ദേശങ്ങളാണ് യുഎസ് മുന്നോട്ട് വെച്ചിട്ടുള്ളത്.
എന്നാല്‍ ലബനന് നേരെയുള്ള ആക്രമണങ്ങള്‍ അടക്കം അവസാനിപ്പിച്ചാലേ ചര്‍ച്ചയ്‌ക്ക് തയാറെടുക്കൂവെന്നാണ് ഇറാന്റെ നിലപാട്. ഉപരോധങ്ങള്‍ അവസാനിപ്പിക്കണം, മരവിപ്പിച്ച ആസ്തികള്‍ വിട്ടുനല്‍കണം, യുദ്ധവും ഉപരോധവും കാരണമുണ്ടായ നഷ്ടം നികത്തണം, ഹോര്‍മുസില്‍ ഇറാന്റെ പരമാധികാരം അംഗീകരിക്കണം എന്നീ നിബന്ധനകള്‍ പാകിസ്ഥാന്‍ മുഖാന്തിരം യുഎസിന് ഇറാന് കൈമാറി. യുഎസ് മുന്നോട്ടുവെച്ചിട്ടുള്ള നിബന്ധനകള്‍ പാലിച്ചാല്‍ സമാധാന കരാറിലെത്താമെന്ന് പാകിസ്ഥാന്‍ ഇറാനെ അറിയിച്ചിട്ടുണ്ട്.
അതേസമയം ഹോര്‍മുസ് കടലിടുക്കില്‍ കുടുങ്ങിക്കിടക്കുന്ന കപ്പലുകളെ രക്ഷിക്കുന്നതിനായി ആരംഭിച്ച പ്രോജക്റ്റ് ഫ്രീഡം എന്ന ദൗത്യം പാകിസ്ഥാന്റെ അഭ്യര്‍ത്ഥനപ്രകാരം നിര്‍ത്താന്‍ യുഎസ് തീരുമാനിച്ചതായി യുഎസ് സ്റ്റേറ്റ് സെക്രട്ടറി മാര്‍ക്കോ റൂബിയോ പ്രസ്താവിച്ചു. പ്രോജക്റ്റ് ഫ്രീഡം ദൗത്യം നിര്‍ത്തിവെച്ചാല്‍ സമാധാന കരാറില്‍ ഏര്‍പ്പെടാന്‍ സാധിക്കുമെന്ന് പാകിസ്ഥാന്‍ അറിയിച്ചതിനെ തുടര്‍ന്നാണ് ഈ നടപടി.
