മുംബൈ: ഭാരത ക്രിക്കറ്റ് കണ്‍ട്രോള്‍ ബോര്‍ഡ് (ബിസിസിഐ) വിവരാവകാശ പരിധിയിലല്ലെന്ന് സുപ്രധാന വിധി. ബിസിസിഐ) വിവരാവകാശ നിയമത്തിന്റെ പരിധിയില്‍ വരുന്ന ‘പബ്ലിക് അതോറിറ്റി’ (പൊതുസ്ഥാപനം) കേന്ദ്ര വിവരാവകാശ കമ്മീഷന്‍ (സിഐസി).
ഇന്‍ഫര്‍മേഷന്‍ കമ്മീഷണര്‍ പി.ആര്‍. രമേശ് ആണ് ഉത്തരവ് പുറപ്പെടുവിച്ചത്. ഇതോടെ ലോകത്തിലെ ഏറ്റവും സമ്പന്നമായ ക്രിക്കറ്റ് ബോര്‍ഡിന് തങ്ങളുടെ ആഭ്യന്തര വിവരങ്ങള്‍ വിവരാവകാശ പ്രകാരം പൊതുജനങ്ങള്‍ക്ക് നല്‍കേണ്ടതില്ല. 2018 മുതല്‍ ബിസിസിഐയെ വിവരാവകാശ നിയമത്തിന്റെ പരിധിയിലാക്കുന്നതുസംബന്ധിച്ച് നിയമ പോരാട്ടങ്ങള്‍ നടക്കുന്നു. അതിനാണ് ഈ വിധിയോടെ അവസാനമായിരിക്കുന്നത്. ബിസിസിഐ വിവരാവകാശ നിയമത്തിന്റെ പരിധിയില്‍ വരുമെന്നായിരുന്നു സിഐസിയുടെ മുന്‍ നിലപാട്. എന്നാല്‍, ബിസിസിഐ ഭാരവാഹികള്‍ ഇതിനെതിരേ മദ്രാസ് ഹൈക്കോടതിയെ സമീപിച്ചു. സുപ്രീം കോടതി വിധികളുടെ പശ്ചാത്തലത്തില്‍ ഈ വിഷയം പരിശോധിക്കാന്‍ ഹൈക്കോടതി കമ്മീഷനോട് ആവശ്യപ്പെട്ടു. ഇതേത്തുടര്‍ന്ന് കാര്യങ്ങള്‍ വിശദമായി പഠിച്ച് സിഐസി സുപ്രധാന വിധി പുറപ്പെടുവിപ്പിക്കുകയായിരുന്നു.
തമിഴ്നാട് സൊസൈറ്റീസ് രജിസ്ട്രേഷന്‍ ആക്ട് അനുസരിച്ച് രജിസ്റ്റര്‍ ചെയ്ത ഒരു സൊസൈറ്റി മാത്രമാണ് ബിസിസിഐ എന്നും ഇത് ഭരണഘടന പ്രകാരമോ പാര്‍ലമെന്റ് പാസാക്കിയ പ്രത്യേക നിയമം വഴിയോ രൂപീകരിക്കപ്പെട്ടതല്ലെന്നും സിഐസി വ്യക്തമാക്കി.
നിലവിലെ സാഹചര്യത്തില്‍ ബി.സി.സി.ഐ-യെ വിവരാവകാശ നിയമത്തിന്റെ പരിധിയില്‍ കൊണ്ടുവരണമെങ്കില്‍ പാര്‍ലമെന്റിന്റെ പ്രത്യേക നിയമഭേദഗതിയോ സര്‍ക്കാര്‍ ഉത്തരവോ ആവശ്യമാണ്.
