തിരുവനന്തപുരം: മുസ്ലിംലീഗിനെ കര്ശനമായി വിമര്ശിച്ചതിന്റെ പേരില് കോണ്ഗ്രസിന്റെ എംഎല്എയായ മാത്യു കുഴല്നാടന് ഒന്നുമല്ലാതായി. മന്ത്രിസ്ഥാനം കിട്ടിയില്ലെന്ന് മാത്രമല്ല, സത്യപ്രതിജ്ഞാച്ചടങ്ങില് തീരെ അപ്രസക്തനുമായി മാത്യു കുഴല്നാടന്.
പിണറായിയുടെ ഭരണകാലത്ത് ഏറ്റവും ശക്തമായ പ്രതിപക്ഷ ശബ്ദമായിരുന്നു മാത്യു കുഴല്നാടന്. വി.ഡി. സതീശനെ മുഖ്യമന്ത്രിയാക്കണമെന്ന് മുസ്ലിം ലീഗ് നേതാവ് പാണക്കാട് സാദിഖലി ശിഹാബ് തങ്ങള് ആവശ്യപ്പെട്ടപ്പോള് കോണ്ഗ്രസിന്റെ ആഭ്യന്തരകാര്യങ്ങളില് മുസ്ലിം ലീഗ് ഇടപെടേണ്ടെന്ന് പറഞ്ഞത് മാത്രമേ മാത്യു കുഴല്നാടന് ഓര്മ്മയുള്ളൂ. പാണക്കാട്ടെ തങ്ങളെ തൊട്ടതോടെ മാത്യു കുഴല്നാടന്റെ കഥ തീര്ന്നു. പിന്നെ മുസ്ലിം ലീഗും മുസ്ലിം യൂത്ത് ലീഗും മാത്യു കുഴല്നാടനെ വളഞ്ഞിട്ട് ആക്രമിക്കുകയായിരുന്നു. ‘കുഴല്നാടാ, നിന്റെ കുഴലൂത്ത് ലീഗിന് വേണ്ട’ എന്ന് വരെ മുസ്ലിം യൂത്ത് ലീഗ് വിമര്ശിച്ചിരുന്നു. മാത്യു കുഴല്നാടന്റെ ഫ്ലെക്സ് വരെ യൂത്ത് ലീഗ് പ്രവര്ത്തകര് കത്തിച്ചിരുന്നു.
മുസ്ലിം ലീഗിന്റെ ആക്രമത്തില് ഒറ്റപ്പെട്ടുപോയ മാത്യു കുഴല്നാടനെ രക്ഷിക്കാന് കോണ്ഗ്രസില് നിന്നും ആരും ഉണ്ടായില്ല എന്ന് മാത്രമല്ല, രാജ് മോഹന് ഉണ്ണിത്താന് മുസ്ലിം ലീഗിനെ വിമര്ശിച്ചതിന് മാത്യു കുഴല്നാടനെ വിമര്ശിക്കുകയും ചെയ്തു. അല്പ്പന് ഐശ്വര്യം കിട്ടിയാല് അര്ധരാത്രിയും കുടപിടിക്കും”- എന്നായിരുന്നു മാത്യു കുഴല്നാടനെതിരായുള്ള രാജ്മോഹന് ഉണ്ണിത്താന്റെ പരിഹാസം.
എന്തായാലും വി.ടി. ബല്റാം, ചാണ്ടി ഉമ്മന് എന്നിവര്ക്ക് മന്ത്രിസ്ഥാനം കിട്ടാത്തതില് മനോരമ ഉള്പ്പെടെയുള്ള മാധ്യമങ്ങള് കണ്ണീര്വാര്ക്കുമ്പോഴും യഥാര്ത്ഥത്തില് കഴിവുള്ള ഒരു എംഎല്എയ്ക്ക് മന്ത്രിസ്ഥാനം കിട്ടാത്തതില് ആരും ശബ്ദിക്കുന്നില്ല എന്ന് സമൂഹമാധ്യമങ്ങളില് കോണ്ഗ്രസ് പ്രവര്ത്തകര് പ്രതികരിക്കുന്നുണ്ട്.
